Ón tjęden so Đura, Fęri, Pepi i Drago sed’eli pre jutr’ešji žganici. Spom’inali so se za stroške štere – donâšajo Bož’ični i Novolétni svetki. Strahota! Zračunali so da bo jim, na drangol’ije, kinč, sladobuze i slične pofrate odišla – sakomo jęna pénzija!

Đura je rękel: “- Deeečki, znâte kaj, jâ mislim ka se bâr za cmreke za Bętlehem naj mórali otrâšati! Cmreki ga f Čepo kulko očeš! Tpęlamo se s prikolicom, pręd vęčer f Čep i saki si podęre cmreka – kakši mo paše! Je tak?! – Morti i kakšega zâjca povozimo ili vlov’imo v guščârjo, pa bo za Božič i – pęčeni zâjec na stolo!”

Pepi jih sumlivo pita: “- A kaj ako nas nešči prime ka krâdemo ili râpšicârimo?”

Đura vel’i: “- Pa, štóóó bo ti vu to dób hodil po šumi! – Čé štó kaj pita, vi pustite męne ka ga jâ – obdélam! – Može?” “- Mooože!”

Pred mrâk so se otpravili z Đurinim Rekordom i prikolicom f Čep! F prikolico so hitili žago.

Dojšli so f Čep. Postoj’ijo na lęši. Pred jimi lépi cmreki! Pepi zéme žago i zagne se …

Onda jim nešči … z kmičnoga guščârja zakrči: “- Stanite dečki! – Kam ste se zaputili?”

Postâli so kak spomen’iki! Pepi spust’i žago doli, kre prikolice … Đura stâne korak napré i pita totoga tam: “- A štó si ti?! – Kaj očeš od nas?!”

Onda mo of z guščârja vel’i: “- Jâ sam nędelski lovec, šteri pâzi ka f šumo naj dojšli kakši râpš’icari ili tâti, ka naj delali kvâra f šumi!”

Pepi mo je onda rękel: “- Čuj, gospon lovec! Mi smo né dojšli sém delat kvâra!”

Onda jim of z kmičnoga guščârja zakrč’i: “- Dobro! Jâ samo gled’im ka naj što dojšel strélat divjač ili krâst cmreke, ili delat nekšo drugo fórmo kvâra!”

Fęri onda, totomo lofco v goščârjo zakrč’i: “- Nééé, drâgi prij’atel! – Mi smo poštejâki i mi se ne bąvimo z kriminalom! Mi ne fóndamo divlač i ne krâdemo cmreke !”

Onda jih of z kmičnoga šikârja pita:

“- Dobro dečki! – Ali ręčite mi, pokaj ste itak vę, vi – štiri móži dojšli, v mrâko f šumo?!?”

… Jęn čâs so s’i štiri bili stiha.

Onda se zglâsil Đura i totmo lofco ovak pov’edal: “- Znâš kaj gospon lovec, mi smo poštęni, pob’ožni, cirkvęni ludi … Mi smo cémeštri v Nędelski cirkvi, pa smo dojšli glet kakši je f šumi méh! Znâš, mi v fârni cirkvi délamo Bętlehemsko štalico, pa nam treba hajdi méha, pa čé ga tu nâjdemo, te bomo pitali gazdo, pa ga nak’opamo, naklâdnemo … i otpęlamo – za cirkvo!”

Odna jim je of z kmične strâni, z guščârja zakr’ičal:

“- Čé ste dojšli po méha za štalico v Nędelski cirkvi, onda se morete sęsti nazâj v aoto i pęlati dimo, jer Nędelska cirkva več ne nuca méha!”

S’i tri so se v jęn glâs pob’unili: ” – Jeee?? – Ne nuca?! – Kaaak to ti znâš, gospon lovec?”

Lovec z kmičnoga guščârja šume zide vum na lęšo, pa jim vel’i:

“- Taaak! – Jâ znám da naša cirkva več ne treba méha za štalico, jer je štalica gotova, naprâvlena, … jer jâ sam – nędelski župnik!”

Dečki so se široko poględnoli, pobr’ali so se v aoto, Đura je dâl gasa!

Onda jim lovec – župnik mâhne i zakrči: “- Dečki! Čekajte!”

Đura postoj’i, otpre bloka na aotu i pita: “- Kaaaj?”

Onda jim lovec – župnik vel’i: “- Drago mi je ka ste pob’ožni i poštęni! – Sretan vam Božič!”

Đura zapre obloka na aotu i stisne gasa!

Onda jih lovec – župnik znova zazove! “- Dečki, čâkajte!”

Đura znova polukne črez oblok na aotu pa pita: “- Kaaaj?”

Lovec – župnik jim vel’i: – “Dečki, pozâbili ste si na lęši kre prikolice žago, ze šterom ste dojšli sém – pregl’edat méha!”

(Jęn)