Đura i Pepi so prekfčęra, f soboto f krčmi zatękli Dragija i Fęrija, i nakon štiri špricari jih pehali – za koga bodo zutra, v nedelo glasali na izborima, ęli za Milanoviča ili za Kolindo?!
Fęri jim je rękel:
“- Znâte kaj dečki, męne vam to, opče ne zanima! – Čista mi je sęjejno – bo pobédil, of ili of!”
Onda mo je Đura rękel:
“- Naaaj prepovédati Fęri! – Znâmo da si ti Esdepejove vere od glâve do pete i da hodiš od hiže do hiže i hujstiš lude naj glasajo za Milanoviča! – Ali vę negder, céle dneve štrpčeš – kak bo zišlo na izboraj! Jer čé tvoji zgobijo, kaj bodo ti rękli oni – štere si nahujstil na Esdepe?!”
Fęri se ovrédil i zakričal na Đuro i Pepija:
“- Što je koga hujstil? – Jâ? – Nigdâr! – Lažlivec! – Opče me né brige za to, tak ka boš znal!”
Onda so Đura i Pepi pobrali na red Dragija:
“- Drago! – Za tębe známo da si cepleni Esdepejovec i da si po Górjemo krajo reznâšal Milanovičove cedule i penkale! – Mi znâmo za koga boš zutra glasal, ali povič nam … moreš vę opče spati – da si tulše lude nahustil na gréh … ili bóš nekam pobégel?! ”
Drago jim je srdito zaz’ijal nazâj:
“- Kaaaj zmišlâvlete?! – Štó je reznâšal letke?! – Jâ? – Nigdâr! – Čé te štó kaj pita, opče me né brige – što bo koga pobedil! – Jâ za nikoga ne navijam i opče néti nejdem glasat! – Męne politika opče ne zanima! – Zatubi si to f svojo trdo tikvo! – Ti je jasno?!”
Da so Đura i Pepi ftihnoli, te so – Drago i Fęri počeli jih rešetati:
“- A kaj vi dvâ!? – Čujemo da hodite po sęli i ludima govorite da, ako nado glasali za Kolindo, da več nado smeli dóma pajceke klati, da bodo plâčali poreza na sunce i déšč i poreza na jęjci štere jim kokoši znęsejo! – Povičte, kam bote vi dvâ pobégli ako zgobite izbore?!”
Đura i Pepi so jim rekli:
“- Kaaaj? – Najte mlâtiti gluposti! – Mi se z bedastóčaj ne bâvime! – Nas politika ne zanima!”
Drago se né štel zastaviti nego jih je i dale pehal:
“- Naaajte lag’ati! – Po Glavariščo hodite agitérat okóli stâri ludi i govorite jim da – čé nado glasali za Kolindo, da bodo zgobili pénzije i da bodo kruha jeli pâr-nepar: muški samo f pârne dneve, a žénske samo v nepârne dneve! – Je tak? – Priznajte! – Pa imamo svedoke!”
Pepi i Đura so se hapili kričati:
“- Ne lažite! – Kaj zmišlâvlete?! – Štó koga hodi plašit? – Nas politika opče ne zanima! – I nigdâr nas je né zanimala! – I ftihnite, vi provokatori!”
Drago i Fęri so se fpirali: “- Miiii provocéramo? – Pa s’i znâjo da ste vi Hadezejovi agitatori!”
Đura i Pepi so se bránili:
“- Néje istina! – Nas politika nę entereséra! – Vi štrpčete céli tjęden! – Vęč ste trdi od strâha!”
“- Štó je trdi?! – Nam je to zâdja briga! – Vam se vidi – ka ste blédi i nenaspáni!”
“- Lažete, lažlifci #$%&%$# !”
“- Vi lažete, bánda jęna #$%&%$#!!!”
Onda je intervenérala krčmarica Kata.
* * *
Dénes pred jęno vuro, f kóto Katine krčme sedeli so Pepi i Đura. Sámi. Stiha.
Onda so f krčmo dojšli Drago i Fęri. Stali so si pred šank i naručili si špricare.
Zgledali so f kóto Đuro i Pepija.
Drago i Fęri so se med sobom spominali kak je né lépo ka se z ovima dvéma ne spominajo … “bez veze so se posvadili s dobraj pajdâšaj – za politiko” … “kak zgled’i, ove dvâ Hadeze opče ne zanima” … “néje trebalo dojti do tote svâje” …”škoda” …”najbole bi bilo ka se pomirijo” …
Rękli so krčmarici Kati:
“- Katica, dęj našim prijatelima f kóto, dvâ gemište! … Zâdji pót smo se malo posvadili – nekaj za Hadeze, a to jih, kak zgled’i, opče ne zanima … pa bi bilo dobro ka to sę skupa i toto svâjo pozâbi i … ka se pomirimo …!”
Kata se je nagnola prék šanka k Dragijo i Fęrijo, pa jim postihoma vel’i:
” – Gemiiište? – Ovi dvâ f kóto ne pijejo gemišta, nego oranđado! – Kaj ne vidite?”
“- Kaaak? – Kapa, se ostâvlajo pijače?”
“- Nééé! – Kaj nęznate? – Sida mi je dénes pólne v zadrogi rękla da je Đuro fčęra, v nedelo, po sedmi vuri, s čistoga mira, da je gledal televizijo – stisnolo ober želóca, pa se je sfrkal i vruhnol! – Te so zvâli Hitno i otpęlali so ga! – Rom nekak v isto dób, povédala mi je Liza, i Pepi si je zel tranzistora na zahod i kak je tam poslušal vésti, zružilo je i – tam se je zrušil! – Kóma ga je dovlekla vum i spravila v aoto i sin ga je otpęlal na Hitno! – Tam so ga zadržali črez nóč! – V isti sobi z Đurom so ležâli! – Dénes v jutro so jih pustili dimo! – Dobili so inekcije! – Doktor jim je prepisal normabele 15 i najstrožiše jim je zabránil piti alkohola, najméje tri mesece!
– Inače, na Hitni f Čakofco je v fčerâšjo nóč bila straaašna stiska!”
