Sida je f tork bila v mesnici. Kupila je za svetke, kak se šika dobrim gazdima, dvâ dimlene bónceke, štiri pâre selhani kolbâsi i suha dimlena rebreca. V zadrogi je pajdóč kupila štrnájst kugli i dvé kile cickoši – za bętlehem! Da je dojšla dimo Đura ji je hapil sponâšati:
“- Tuuulko mesovjâ?! – I to samo toto – potkajeno masnóčo?! – Znâš ti ka ja to nęsmim jesti! Pâk bo mi tlak skočil v zrâk a âk-i-onâk imam visokoga kulko sam dugi! Pa i cukora imam kak da sam cukorpekar! – Kaj se me očeš réšiti? – I čęmo cickoši i kugle? Za koga bomo delali bętlehema da vnuki najo dojšli k nam?! – Sam frčkaš péneze!”
Sida se resrdila, zafrknola je z nosom, mesovj’e je porinola vo frižider i néje rękla néti réč.
F srédo je Sida na stolo resprestrla nekšo drob’erje i povrtel i neka preprâvlala. Đura jo pita:
“- Kaj to délaš?”
“- Preprâvlam za božični obed.”
Đura se začudil, črno jo je gledal i pital:
“- Pa tóóó?! – Picekove pęroti? – Kokóšje škrample? – Tó bomo jeli za Božič? – Si ti prâva?!”
Sida se je sela na štokrlin pa mo je – kak čovek čov’eko, počela tomâčiti:
“- Lépo sam kupila bónceke, kolbâse i suha rebra! I te si mi sponâšal ka ti to nęsmiš jesti i pital me – čé se te očem réšiti! Za cickoše pa si rękel – da jih opče ne nucamo, da namo delali bętlehema jer – némamo za koga! – I onda sam só to jestvino i cickoše i kugle – dâla sósedovaj Lizi i Pepijo! Oni imajo malo deco. Reko, ka jim bâr jęmpot poštęno čestitam Božiča, da je več tak! – Jer – kaj bom vę zótim čé se tó nagrâža tvojomo zdrâvjo i čé to ne nucamo?!”
Onda se i Đura sel na stolec (noge so mo otpovedale):
“- Kaaaj? – Sę ono kaj si fčęra kupila, sę si dâla Pepijo i Lizi? Sam tak? – Pa si ti normalna? Ręči jim naj to odma vrnejo nazâj! – Zmisli kaj očeš, ali naj to vrnejo nazâj! “
Sida je bila v nevóli! – Rękla je Đuri ka ona to od Lize nębo iskala nazâj:
“- Pa męne bi vę bilo sramota ka bi v zęmlo prepâla, iskati – božičnoga dâra nazâj!”
Đura ji je rękel da, čé ona nav zvâla Lizo, da bo – ón zvąl k Pepijo! – I zel si je tefóna v róko:
“- Halo Pepi! – Čuj, moja Sida je fulala! Krivo je tvoji Lizi dâla dâra za Božič! Dogovorili smo se ka ti dâ ono škat’ulo s flašéranim cépom z mojih goric, a ona se zmotala pa je Lizi dâla – ono škatulo, ono dé so bunceki, kolbâsi i suho meso! Razmiš … zmotala se! – Pa mislim ka bi nam vrnoli – tote bónceke, kolbâse i to! A jâ ti dám za dâr – svojega cépa, dvé flâše!”
Pepi mo je rękel:
“- Razmim Đura, razmim! – Mooože! – Róm se pęlamo z Čakofca! – Čé očeš moreš mi totoga cépa nastaviti kre pótni vrât, pa si vę to zémem pajdóč! A bónceke, kolboâse i drugo ti vrnem odma, čim dójdem dimo i nâjdem to vo frižidero, to kaj nam je tvoja Sida daruvala!”
Tak so se dogovorili i Pepi si je pre Đurini lesi zel škâtlo s Đurinim flašéranim cépom.
Minola je odvečerka, a Pepija ga né! Néje Đuri dopęlal bónceke, rebra i kolbâse nazâj!
Đura ga je zvâl:
“- Pepi, pa dé si? – Sida bi preprâvlala tote bunceke i rebra jer se to dugo mora kuhati …”
Pepi mo vel’i:
“- Đurek, evo odma! Dójdem! – To tvoje je Liza déla vu frižider, a ona je vę dobila vručino i fést kašla, valda te ima korono … zato smo bili f Čakofco… pa si je legla, pa jo nadvârjam!”
Đuri je zabeglo! – Široko je poględnol Sido! – Obedvâ so zavustali… ftihnoli… Onda je Đura malo dojšel k sęj, zmogel je glâsa pa se hapil Pepijo ovak povédati:
“- Čuj Pepi, pa ne móraš te to odma, nego da boš videl, čé Liza ima korono … ili… pa te…!”
I Đura je spustil slušalico.
Do večeri se je né nišči z nikim spominal, pa je te Đura zvâl Pepija. Pital ga je:
“- Pepi, čuj, kak ste? – Je tvoja Liza zdrava ili ima korono virosa? – Ka naš mislil ka te zovem zaradi oni bónceki, rebri i kolbâsi. – Nééé! – Nego v brigi smo za Lizino i tvoje zdrâvje!”
Pepi mo je odma sę povedal:
“- Nęznam to točno! Išče kuri i kašla! – Zvâl sam znova f špitâl i jéno doktorico, pa so nam rękli kak i fčęra, da – naj zutra dójde na testéraje ka bodo sigurni!”
Đuri je znova vgasnolo f pipi pa mo je tóžno rękel:
“-No, je! – Kaj moremo! – Naj mi nositi tote bónceke i kolbâe! – Prvo se brigaj za zdrâvje!”
Na Badnjak pólne je Đura zvâl Pepija, pa ga pita:
“- Halo Pepi!- Kak ste kaj! – Kaj vel’ijo doktori? – Je Liza zdrava? – Résen, ka naš mislil ka te zovem zaradi bónceki, kolbâsi i selhani rebri, nego brigam se za vaše zdrâvje! – Kak je kaj?”
Pepi mo je ovak rękel:
” – Znâš, bili smo pre doktoro! – Liza je tak kak i fčęra! Vuni néma temperaturu samo nutri, a jâ f šporhato fést kurim, znâš – kuhali smo hajdi toga …pa te nęznam… – Ali vę jâ imam vročino i želódec me šrâjfa … valda mi je to né od pręveč kóštaja pijače i jestvine … pa so te i męne f špitâlo testérali na korona viros jer sam se hudo držal… da sam več bil tam! – Ali rękli so da bodo rezoltâti testéraja stopram – da minejo svętki, jer očejo i oni meti Božiča! – Jâ sam jim onda rekel:
“- Imate praf! – I čé vam po istini povém, opče nam je né sila za tote vaše nalaze, bâr né tak dugo dok trajajo svetki, ka mi s krivaj nalazaj – kaj ne pokvârite!”
