Na Veliko soboto so na večeróji meši svętili posv’ečaje. Sida se ravnala k meši.
Đura jo pita: “- Si dosta toga déla f cekar? – Ka nav sfal’ilo?! – Ka namo lačni?!”
Sida vel’i: “- Dooosta! – Déla sam tri hrge šunke, tri pâre kolbâsi, dęset jęjci, hréna, orehove kolâče … – Joooj, več je trifrtâl, a išče sam se né počęsala … Pusti me na miro, žurim se!”
Pre pótnaj vrâtaj jo je počakala sóseda Liza, pa ji vel’i: “- Sidika drâga, nam ftegnola nęsti posvečaje! – Prosim te odnęsi i moje! – Tu sam déla falat šunke, pâr kolbâsi, jęjci, hréna i orehovoga kolâča! – Mi zutra pemo k snehi v Lopatinec … pa nębreš te tam… znâš kak je…!”
Sida je déla jéno posvečaje f svoj cekar, sęla se na biciklin i tpravila se f cirkvo!
Na vulici jo je počakala Dragijova Jula: “- Sidika drâga, lubléna, jâ nęęębrem nęsti posvečaje! Prosim te odnęsi moje, jer mój Drago oče jesti šunko čim odvežejo zvóne! – Zutra, na Vuzem pemo z vnukaj k poln’ešji! – Tu je hrga šunke, neka kolbâsi i neka jęjci, malo hréna i orehov kolâč. Déni prosim te, kcój k svojemo, pa da peš dimo, te mi stâviš … – Bóg ti stópot plâti!”
Sida je tirala biciklina f cirkvo, a na póto zide Fęrijovo Ilko! – Pita jo: “- Ilka, kaj ti nejdeš?”
“- Drâââga Sidika, nęęębrem! – Kânila sam iti ali … da bi mi bâr … nešči … ili čé bi ti …?”
Sida se por’ine: “- Pa, dęj ka ti jâ odnęsem posvečaje, čé róm nębreš iti …!”
“- Bóš tak dobra?! – Prosim te! – Zémi, tu ti je falat šunke, pâr pâri kolbâsi, malo hréna, kruha, jęjci i orehov kolâč … Prosim te! – To ti nigdâr nam pozâbila!”
Meša je trajala dugo. Stiska. Nazâdje so svęt’ili hráno. Župnik je išel gori – doli po cirkvi i svętil! Sida je porinola róko globoko f svoj cekar i potegla svojo šunko, štera je bila najocpót – gori, ka bo na vrho, ka bo najbole posvęčena! I jestvino je reskrila!
Meša je minola v deseti. Tpravila se dimo.
Po kmici je tirala biciklina. Postâla je pre Ilki. Róm so dogotâvlali vuzménko na vrto.
Zvâla je Ilko na dvór: “- Hodi Ilka! Zémi svoje posvečaje! Ti najbole znâš kaj je tvoje!”
Ilka i Fęri so dobejžali na dvór i zeli si! “- Sidika, sręčen ti Vuzem!” “- I tębi i tvojima!”
” I išče jęmpot fâla ti najlepša!” “- Néma na čęmo!”
Onda je obrnola z biciklinom k Dragijo i Juli. I oni so bili z pajdašijom na vrto pre vuzménki. Išla je râvno na vrt. Rekla je Juli i Dragijo: “- Hote, zémite si svoje posvečaje, vi najbole znâte kaj je vaše!” Drago i Jula so po kmici, svoje premętali f svoj cekar: “- Sidika, to je to! – Bóg ti stópot plâti! Sręčen Vuzem i Vuzmęni svetki!” Sida je z biciklina zakričala: “- I vam!” “- I fâla!” “- Néma na čęmo!”
Dopęlala se do Lize. – Liza je čakala pre pótnaj vrâtaj, jer se joj je nâdjala. Veli joj:
“- Sidika, jęsi?! – Ideš malo nutri? – Si sedeš na špricar?!
Sida ji veli: “- Nééé, Liza! – Žurim se! – Of mój je doma več tak lačen tak ka blódi! Samo si ti zémi svoje! – Ti najbole poznaš svoje!”
Liza si je pre pótnaj vrâtaj premętala svój dél posvečaja. – Sida je zajahala biciklina:
“- Ęjda Liza, lęfko nóč i sręčen Vuzem!” “- I tębi! – i Bóg ti plâti!” “- Néma na čęmo!”
Dopęlala se dimo. Đura je čakal pre stolo: “- Pa dééési tak dugo?!”
Sida mo vel’i: “- Jęęę, dugo je trajalo! – Onda pa išče … pre Juli, pre Ilki, pre Lizi …! – Na, tu ti je cekar! – Zémi si i moreš jesti! – Bóg ti blagoslovi! – Jâ se prebléčem i jâ dójdem jést!”
Đura je ofnal cekara. – Zgór … jęjci, cpód … jęjci! “- Sida, pa kulko si jęjci nęsla .. tu ga jih jęno pędeset … – Sida … same jęjci … Néga nigder šunke!? – Sida, nega néti jęnoga kolbâsa!? – Sida, f cekaro so samo jęjci i jęjci i … glej … â … jęna konzerva mesnoga doručka ..!?
