Đura je kak precednik Udroge penzijonéri Glavatišče, pred dvâ tjędne dâl proglasa članima:
“- Poštovane članice i člani! Za dęset dni naša Udroga slavi dęsetgodišnjico postojaja. Za toti dén planéramo objaviti da smo mi ujedno i prva Udroga v Glavatiščo, prva v zapadnoistočni Hrvacki i prva v Evropsko-mađarski uniji, čiji so se – s’i članovi cépili protiv korone virosa. Zato prosim članove da, ako se nešči slučajno, eventoalno, néje cépil, naj to napravi bâr jęmpot, v sledéčih dęset dni, tak ka bomo zasigurno cépleni sto-posto! Vidimo se f srédo tridesetoga juna na svečani sjednici i na dočeko nóve polovice nóvoga léta!”
Od sih člani Udroge, kulko se moglo zazvediti, Drago i Fęri so se jed’ini né cépili. Né so se šteli! Jive žęne Jula i Ilka so se cépile dvâpot! Beštejarile so i prosile svoje móže:
“- Deeečki, cépite se čim predi. Cépite se bâr jęmpot ka nębo kakši škandâl! Povéda se ka bo Precednik Saveza Udrogi Zajednice udrogi Drâfskoga bazena Đuri prędal priznanje i ordena zaslugi za cépleje nâroda, pa ka naj nešči zazvedil ka ste se vi dvâ né… i onda škandâl…!?”
Đura i Fęri so se trdo fpirali:
“- Néti govora! – Jęmpot smo jâ i Fęri išli čakat toto cépleje, stâli smo tam – vęč od frtâl vure ka so me komârci spikali! – A męne da komârec fpiči – jâ ponoréjem!”
Ali, kaj je najvažniše, vę postâja unosno – né biti cépleni! – Gledite i čitajte malo! – Dalmatinci onima štere nagovorijo na cépleje dâvlejo zabadav ulaznice za f kino i f kazališče, Zagorci onima šteri se vę cépijo dâvlejo zabadav kârte za Stubičke, Tuhelske i Krapinske toplice! Srbijanci svojaj vę dâvlejo péneze. Poględnite Ameriko, a mi jih stâlno i f sęmo kopéramo! Oni svojaj šteri se vę pejo cépit dâvlejo – vu Virđiniji sto dolari, v Nju Đersijo kišto pive, v Detroido 50 dolari, druge jive države dâvlejo takšima plačene rezeracije za restorane, hotele..! – Bóte vidle, začas bo i k nam dojšlo to, ka bodo nas mitili ka bomo se šteli cépiti! – I kaj bi se te čovek rival na cépleje!? – Osim toga, pitam jâ vas, štó opče znâ – štó se je cépil, a štó né!?”
Žęne so jih i dale nagovârjale naj se cépijo ka nębo škandâl, ali – zabadav!
F srédo je bila proslava dęsetgodišnice Udroge penzijonéri Glavatišče. Zbrali so se s’i penzijonéri, sih osemdesetšest člani Udroge. – Dojšel je i Precednik Saveza Udrogi Zajednice Udroga Drâfskoga bazena. On je Đuri dâl ordena zaslugi za cépleje nâroda. Čestital mo je ka je Udroga penzijonéri Glavatišče prva i jedina udroga v Glavatiščo, prva v zapadnoistočni Hrvacki i prva v Evropski uniji, čiji so se s’i članovi cépili protiv korone! Zaradi toga Udroga Glavatišče, s’i članovi so – dob’ili izleta i čaščeje v najluksuznišomo slavonsko-barajskomo restorano! Zutra v jutro dójdo dvâ aotobusi i pęlajo članove na toti izlet!”
Da so Drago i Fęri v noči išli dimo z sastanka, gizdavo so povédali svojaj žęnaj:
“- Ste vidle?! – Ste vidle?! – Nazâdje bomo mi dvâpot šeftali! – I predi kak se cépimo i potli! Pa, kaj bi se te čovek rival čakat cépleje i hránit komârce!”
F četrtek v jutro pred Udrogom so čakali dvâ aotobusi. Dojšli so s’i člani Udroge! Otpęlali so se f toti luksozni restoran, v najlepšim falato prirode Baranje i Slavonije!
Da so dojšli tâ, počakali so jih, jęden domâči gospon i Precednik Saveza Udrogi Zajednice Udroga Drâfskoga bazena. Pozdravili so jih, čestitali jim i – of jakši jim je napravil govora:
“- Drage kolegice i kolegi! Vi šteri ste najsvésniši f Hrvacki, čestitam vam na vaši odgovornosti i brigi za druge! Odlučili smo ka vas vu toj turističkoj hiži, v neteknotoj prirodi ovoga kraja, počastimo ze gastronomskim špecijalitetima i najbolšim vinima naše Slavonije.
Moram biti krâtek, jer v ovomo našomo krajo, ojzder f prirodi, komârci grizejo krvoločno i zâto vas odma pozivlem nutri v naš gastronomski i vinski hram, dé vas na stolo čâkajo špecijaliteti! – Samo predi, prosim, prepravite svoje potvrde ka ste bili cépleni, za našo poslovno evidencijo i za evidencijo sponzora ovoga čaščeja, Saveza Udrogi Zajednice Udroga Drâfskoga bazena, jer to je i inače uvjet za ulazak f toti naš motel, restoran i slavonski vinski hram! – Žurite se s potvrdaj, jer komârci več žęrejo kak nori!”
