Đura je f soboto v jutro sezval svoje pajdâše, Pepija, Fęrija i Dragija. Sęli so se v jęgov preriftani i vređeni vęštet i on jim je rezlagal ovak:

“- Dečki, čé bo tak kak smo zrękli – ka bomo z žęnaj skupa gledali sę utakmice Svéckoga prvenstva v mojemo preoređenomo i zbegecanomo vęšteto, vę, dvâ tjędne napré, saki dén bomo gledali štiri utakmice! – Né semti prepust’iti néti jęno! – Aaali, za rędno gledaje totoga svéckoga nogometa moramo se ozbilno prepraviti. – V dvâ tjędne rezigrâvaja, treba bo presedeti kre televizora sędemdesetpet vur i treba bo osigurati sę, kak se to šika našomo sojo nogemetaškoga kadra!”

Govoril je dale:

“- Ti Drago bóš se pobrigal pre Mihaličo i Vajdi za pet plati narézanoga i za štiri-pet kotâči špekarice i jegera!”

“- Fęri, tvoja briga bo ka se pobrigaš, takâj pre Mihaličo ili pre Vajdi za tridęsti kil kolbâsi i nekaj malo méje hrénofki!”

“- Pepi, ti boš se pobrigal za kurilo vu vęšteto jer dóma imaš vęč-štiti klaftre nacépanih drv i onda, ka nabâviš – sę drugo kaj ide k jestvini štero bomo osigurali! Znači, k kolbâsaj je treba vugorke, sénfa i avijara, k narézani tiblici luka, čęšjaka i hréna i kuhanę jejci – jęno pędeset!”

“- Jâ bom za totih štrnájst dni rezigrâvaja osigural dęvedeset litri svojoga prvoklasnoga vina, a to vam je dvâ litre po utakmici i osem kišti kisele vode, sę to po nabavni céni!”

“- Jâ mislim ka bote se z męnom složili ka bomo naše žénske za toto priliko oslobodili sih brigi…preprâvlaja… róm čé štera zasukne kakšoga štrukla ili zlévanko… opče né važno…!”

I to bomo jim odma vę dâli do znája! – Dogovoreno? – Dogovoreno!”

Đura je odma, ka to pucaj obznâni, zvâl Sido:

“- Siiida! … – Siiida!? … – Siiidaaa??!

Nišči se je né javil! – Išel je vum na dvór zvât! – Né se je javila! – Te je ovak zaklučil:

“- Néga je! – A pred jęno vuro je bila f kuhji!? – Sigorno je pre Lizi ili pre Juli…?!”

Te so ovi z svojaj mobitelaj zvâli svoje žęne ka pitajo za Sido i ka jih informérajo… Néti jęna se né javila! Telefóni so zvon’ili ali… zabadav…

Za, malo vęč – pól vure od nekod se je vu vęštet dožurila Sida:

“- Vidla sam Đura ka si me zvâl ali sam se né mogla javiti. – I ove druge žénske so čule ka ste jih vi móži zvâli, ali so se né mogle javiti! – Bile smo na sastanko pre Juli! – Na dogovoro…!”

“- Kakšomo sastanko? – Kakšomo dogovoro?”

Sida se je zadsopjena, sela pa jim je ovak povédala:

“- Đura, čula sam – kaj ste se dogovârjali i organizérali gledaje utakmici, skupa z nami! – Čim sam to čula, odma smo i mi žénske napravile sastanka i … makar naj pręveč rade… to z vami … ipak smo zrękle – ka te bómo, ali ka se i mi póseb… kóli toga sęga dogovorimo!

I – dogovorile smo se! – Rezdelile smo si dužnosti ka bomo mogle mirno z vami gledati toto svécko prvenstvo i našo reprezentacijo!”

“- … …?!?”

“- Ovak! – Mi tri, jâ, Jula i Ilka smo se zavzele ka bomo za toto rezigrâvaje nabavile: štiri čikapernice, po dvâ partviže, šibnate i sirkove mętle i dvajsti mali i veliki roli papéra! – Onda po dvé šar-kęfe i gumje za strugaje, ribaje i odštopâvaje! – Onda pâr Čarliji, Antiscali i druge kemije za snâžeje, práje i brisaje po utakmicaj – céloga stája od podi do lujstri…”

Onda je Pepi, zaskrbleno zlętel Sidi v réč, pa jo je zapital:

“- Sóseda Sidika, rękla si ka ste se – za sę to zadužile ti Julika i Ilka!? – A kaj moja Liza? – Kaj ona… nav nikaj…?”

“- Jęsmo drâgi Pepi i jó! – Ona si je sirota zela najhujšega déla posla! – I več se je otpęlala f Čakovec! – Ona se zavzela ka bo za našo gledaje totoga ritaja – naaajkesneše do sréde, nabavila po štiri škat’ule Klavocina, Apaorina, Normabela, Amoksicilina Streptomedicina, Sulfacetamida, Eritromicina, Plivadona, Lumpoceta, šęrek gazi, frbanti i čepiči za sę spehe téla, pred vęštetovaj vrâtaj kánto vode i … telefónskoga broja od črlénoga križa…!”

Povratak na naslovnicu…