Sidin vnuk, Zdénkin sin Kadir je dénes prvič išel f prvi razred. Nešči je móral prve dneve iti z jim. Ali prve dneve tjedna je Zdénka rom, ze svojom udrogom f Kvitrofco méla kotarsko natjecaje f prekopicâvajo, pa je né mogla dečkéra pęlati f škólo. Te je prosila bako Sido ka se v ned’elo dosęli k jim, i ka bo dečkéra vodila f škólo mesto j’e. Zdénka ji je govorila:
“-Baka, išla boš s Kadirom f škólo i nazâj sam zaradi toga ka se dečkér ne zgob’i. – Čé bi ti se Bóg nędaj, dečkér zgubil, odma me nazovi!”
F pondélek v jutro mali je Kadirek več f sedmi vuri bil barajt s tâškom na hrpto i čâkal. Baka je na sębe flętno namętala cójke i génoli so. Pęlala ga je prvi stó metri za róko, ali jo je dečkér pustil z rókom i rękel:
“Baka, naj me drž’ati za róko! Naš mę pęlala za róko kak kašoga zaostaloga!”
Išli so prti škóli i Kadirek ji je po póto povédal:
” -Viš baka, to ti je hiža od Nele štera ide dénes skup z męnom f škólo. A â, to ti je hiža od Kovačiča šteri déla na opčini i ima plâčo dvé hiladesędemsto … a â, to ti je hiža od Šincekovih. Jiv japa je vetrnâr. A tota zeléna, to ti je hiža od Marija, čija mama je učitelica v Drugi osnovni. A ova hiža z balkónom, to ti je hiža od Majničke štera se vę tretji pót ožęnila i ima déte z prvim i tretjim, a of stariši je leto dni mlajši od męne… A vę móramo iti prék ceste. I viš, ono tam to je komonâlno dé déla naš sósed Drago ki po odvečerkaj fuša… a ova tu hiža, to ti je hiža od šoce od tatinoga šéfa. Óna déla f transporto. A ova hiža ti je od dotepénci z Bélice. Oni imajo puno pen’ez makar nika ne délajo. Tu je Pero, a pre tretji Milica šteri idejo isto dénes prvič f škólo. A v ovi stambeni hiži na drugim kato živ’i Dado, a na tretjemo Marko šteri hodijo v isto škólo kam idem jâ, ali drugi i tretji razred. Vuti hiži je Vida šteri igra v Emtečejo i s Koprekovom Katom ima déte…”
I tak išče kilometer. Kadir ji je povédal baki za sako hižo, štó vu ji živ’i, zóčim se bâvi, kakšoga aota ima, ję li sastâvleni ili restâvleni, kulku plâčo ima, šteri ima šoca ili šoco i sę drugo. Da so dojšli pred škólo, dečkér je prsta vupral v bako Sido pa ji vel’i:
“- Baka, ti vę nejdi dimo ka ne zablódiš. Tu se na ono sol’ico pre ploto sędi i sédi. Tota škóla bo gotova za vuro i pól. Te pemo dimo!”
Tak je i bilo. Da je škóla bila gotova, dečkér je dobejžal do bake pa ji je rękel:
“Čuj baka, škóla je gotova. Jâ bom vę išel dimo z svojaj kolegaj… Ti idi odzâdi … jęno tridęsti metri za nami.. pomali … ka se ne zgob’iš… jer tak idejo dečki z škóle…!”
Tak so išli pomalem dimo. Dečkéri napré… pa nekše pucke fštrih… pa dečkéri… pa te baka Sida pędeset metri za jimi… Ali, išli so po malo drugakšaj vulicaj nego sém. Za pet minot je dečkérec dob’ejžal do bake nazâj pa ji vel’i:
“- Baka, dęj mi dęset eori, jer tu je slastič’arna pa bomo – mi dečki išli nutri ka si neka pol’iznemo i neka pošl’oknemo, a ti nas počâkaj, tam pod kost’ajom, ka naš na sunco stâla…”
Za pol vure je tó f slastičarnici minolo, pa so déčje part’ije génole dale. Baka Sida je róm né bila sigurna dé je, ali je bila sig’urna ka je – na dobromo póto! Za frtâl vure je Kadir postâl ka ga je baka dost’igla, pa ji milicajski vel’i:
“- Čuj baka, dęj mi dvajsti eori. To bo ti mama vrnola, tak smo se dogovorili,. Znâš tu je pic’erija, a jâ i dečki smo več tak lačni ka bi vuka poj’eli! Ti tu f hlâdo počâkaj.”
Dečkéri so dišli nutri i né ga jih bilo vum dobrih trifrtâl vure. Te so se jęn po jęn spukâvali, jęni druge načekâvali i pomalem otprâvlali prti nekam. Baka je išla pędeset metri za jimi.
Te so dečkéri postâli pre nekši hâzbi dé je na ajzlogaj s črlénaj slovaj na črnomo glažo pisalo nekaj kaj je baka né znala prečitati, jer je pisalo na strajskomo jez’iko. Kadir ji je tomâčil:
“- Baka, mi ti vę idemo tu nutri, to ti je nekaj za škólo, i učitelica je rękla ka to tre znati… Ti ost’ani tu vuni i čâkaj, a moreš si tu pólek f štacuno nekaj kupiti čé si žejna ili lačna ili…”
Odnot ga jih né bilo vun vuro i pól. A onda so Kadr i jęgovi pajdâši najęmpot zlet’eli vum zóte hâzbe kak métki, a za jimi nekši róm takši gjusi i malo stareši i… kletva, i krič i – beg’ec! Kadirovi so bejžali, ovi so jih tirali, te so se s’i rezb’ejžali… i te je i Sida bejžala, ali nębreš…! Sida je te né znala kam! Te se v jęno stráno zagnâla. Onda je pitala nekše… kak se dójde… néje znala pov’edati kam… Te so oni néti joj… né znali pomoči… Te je blódila prti nekam…
Vu večerójaj vura je zvâla ščerko Zdénko:
“- Čuj Zdénka, jâ sam tu … negder… ka ti nęznam pov’edati…?”
Zdénka je zakr’ičala:
“- Kaaaj? Róm se pęlam dimo! – Kaj se ti je dečkér zgubil? – Kaj, vę ga iščeš?”
Sida ji je tomâčila:
“- Ne, nę povédam ti jâ za to, nego ti povédam … ka nęznam dé sam…!”
Zdénka ji je kričala z aota:
“- No, a kaj? – Kaj se ti je dečkér zgubil? – Jâ sam ve dóma, pre hiži, pa te! ….. A, pa Kadir je dóma, na dvoro, igra se z dečkéraj… A f čęmo je problém!?”
Sida si je zdehnola pa ji povéda:
“- Jââ! – V męni!… Jâ sam tu negder… nęznam dé! – Čuj Zdénka, jâ sam se zgub’ila!”
