Sida je dugo magadila, ali jęmpot ji je pregorelo i počela je na Đuro kričati kak respam’ečena:
“- Čuj ti! – Vę je dosta! – Tote mâčke spravi z grunta kak znâš i kam znaš! – Ooosem mâčki hrâniti?! – Pa, saka vréčka z hránom košta pet kuni, a na sakim obroko pojéjo štiri vréčke i tak tripot na dén!? – Pa, kaj nam pénezi na vrbi râsejo? – Lifraj to kam znâš, drugač bom počela strélati #$%&%$#!”
Đura je videl da je Sida ponoréla i vmirjeno ji je rękel:
“- Dooobro! – Ne kriči! – Bóm! …Bóm! – To je najménši problem!”
Đura je zvâl Jožeka naj dójde k jęmo na dogovor. Jožek je dojšel. Đura mo je ovak povédal:
“- Jožek, déni na toti svój fejsbuk oglasa: “Prodâvlem male mâčke, méšavina muškoga perzijskoga i žénske bengalske mâčke! Stari so štiri mesece, a céna je 100 kuni po komâdo!”
A da prodamo platil bom ti stotko za provizijo!”
Jožek ga je poglęnol spod oka, pa mo vel’i:
“- Deeeda, pa naša stâra mâčka je né bengalska! I kak znâš šteri mâček jo je… da ga jih…?!”
“- Tębe to né brige! – Ti to sam tak napiši kak sam jâ rękel!”
Jožek je tak napisal kak mo je deda rękel. Ali f tjęden dni je nišči Đuro né zvâl za mâčke! Đura je znova pozval Jožeka na dogovor, pa mo vel’i:
“- Jožek na oglaso preméni. Déni da je céna 50 kuni po komâo, a sę drugo naj bó – isto!”
Jožek je ispravil oglasa na fejsbuko. Ali céli idoči tjęden je – nišči né zval za mâčke!
Đura je znova pozval Jožeka i ovak mo je rękel:
“- Jožek, napiši na fejsbuko ka takše i takše mâčke, kak si predi napisal – delimo zabadav!”
Jožek je na fejsbuko napisal takšoga oglasa. – Ali f tjęden dni je nišči né zvâl. A Đuro so mâčki saki dén sę več koštali. Te je zvâl Jožeka, pa ga pita kaj naj naprâvi. Jožek mo je rękel:
” Deda, kriza je. Mâčki ga kulko očeš! – Móraš onaj šteri jih zémejo – nekaj dati! – Rečemo, dobro bi bilo napisati tak: “Delijo se mali mâčki, mešavina bengalskoga mâčka i perzijske mâčke, stari štiri mesece. S Obzirom na to ka se kak lubiteli životinji borimo za mačk’iji razvoj, oni šteri zémejo mâčka dobijo – po komâdo dvajsti kuni, za prve stroške zdržâvaja!”
Đura se je složil i – napisali so takšoga oglasa.
I bormeš, drugi dén v jutro pre Đuri je pozvon’ilo pętero dece. Jęna pucka zapita Đurija:
“- Tetec, vi delite mâčke? – Jâ bi zela dvâ, jęnoga črnoga i jęnoga béloga! Možeee?”
Đura je preprâvleno rękel:
“- Mooože, pucika! – Na, tu si zbęri dvâ i nęsi si jih dimo i tu so ti, na – štiri banke!”
Onda je isto to pital jęden dečkér. I on je zel črnoga i béloga i – čętrdeset kuni i odišel!
I drugi dečkér i išče jęna pucka so to isto napravili. I tak so se mali mâčki – rezdel’ili.
A pre vrâtaj je nazâdje stâl išče – jęden mali dečkérec i žalosno pital Đuro:
“- Teeetec, a kaj jâ nębrem róm nikaj dobiti? – Kaj več némate? – A tak bi štel meti mâčka?”
Đura je videl toto žalosno ličece maloga dečkéreca i milostivno mo je rękel:
“- Deeeček drâgi… čé bi ti róm tak štel mâčka – na, tebi dâm stâro mâčko! – Zémi si jo?”
Dečkérec je prijal stâro mâčkof krilo, a Đura mo je porinol dvajsti kuni v žępek!
Da je Đura delil mâčke, i Jožek se je tu najšel. Deca so dišla, a Đura pita Jožeka:
“- Jožek, otkod so sâ tâ deca kâ so móm dojšla i odnęsla mâčke? – Jih mogóče poznaš?”
Jožek se nekaj… malo zmotal, skeščal, pa je Đuri odprilike povédal:
“- Pa nęęęznam róm! – Nešterni mi se vidijo… malo poznâti… Rękel bi da so nekod z ónoga krâja vulice ili z… Jęno pucko znâm z škóle, a ove druge … morti… dvâ…?!”
Pólne je Sida išla f škedej i vidla da ga né nitijęnoga mâčka. Hapila se kričati na Đuro:
“- Pa kaj si – sę zlifral? – Pa si ti normalen? – Kaj vę opče némamo mâčka? – Pa štó bo vę lovil miše? – Pa miši bodo nas pojeli!? – Vę boš ti lovil miše, tak ka boš znal!”
Đura je srdit odišel spât i za mâčke se né štel več spom’inati néti jęno réč, z – nikim!.
Drugo jutro, Sida je zarana išla hránit mârho i spazila je na škedjo nóvo sliko!
Odma se odžurila nutri, zbud’ila Đurija i počela na jęga kričati:
” – Đura, pa što je vę – sę mâčke vrnol nazâj?! – Pa si ti normalen! – I čé si jih dovlekel, mogel si jih bâr nahrániti! Bili so tak lačni i pohlępni ka me je jęden od požrtosti zahačil za prst – dok sam jim dâvala jestvino! – Đura stvori nekaj! – Zlifraj to nekam #$%&%$# ! “
