Ministarstvo udruženog nerada je objavilo ka bo letos najaktivniše udroge sake regije, za Mikulovo darivalo z dârima. Respisalo je poziva ka se jâvi pešona štera je sposobna biti Sveti Mikula na svojomo ter’eno. Đurin Jožek se je javil na natječaj. Bil je primleni.
Za najaktivnišo udrogo prinas, zebrána je Udroga za prekopicâvaje, “Kopriva” z Čepa.
Jožek je dobil uniformo, dopęlali so mo prikolico dâri, spiska od 75 stariših i 73 mlâdih člani od “Čepa”, a krampose si je Jožek móral osigurati sám. To je lefko najšel, toga ga hajdi.
Za Mikulovo je s kramposaj odišel f “Čep”. Od tęčeka Dragija si je posódil nóvoga modęrnoga kombija i vu jęga je naklâl dâre. Umetničkoga programa je né pręprâvlal, nego – popévali bodo ili recitérali oni šteri bodo dobili dâre. Tak je i bilo. – I tó je minolo.
Dvâ tjędne potli Mikulova, Jožek je f sim novinama, na radjaj, v Nedelisto i drugaj medijaj, objavil oglasa f šteromo je napisal ovâk:
“Poštuvani Dedi Mrazi!
Ekskuzivno i hitno prodavlem za Dede Mraze, poklone za sę uzraste, od ščepci do stârci. Dari so čistam nóvi, né râbleni, od mesnih do cukorpekarskih deliciji! Zapakérani so i morejo se odma del’iti! Kupcaj ponujam velikoga popusta. Dâre dostavlam na lice mesta, odma po plâčajo. Plačaje f kešo. Broja telefóna ima uredništvo Nedelista.
Potpis: Sveti Mikula z Glavatišča”
Zazvedilo je Ministarstvo udruženoga nerada, kaj Jožek oglaš’uvle! Za dvâ dni su dojšli vum tri nekši jakši z Ministarstva, ka ispitajo, kaj to on prodâvle!? – Ęli so to né – oni jivi dâri…!?
Jožek jim ję odma rekel da – je, da so to oni jivi dâri! – Aaalli, rękel je, da je to išlo ovak:
“- V udrogo “Čep” išel sam, kak ste mi naložili, pręd Mikulovim zvečera, oblečeni kak treba, s kramposaj na lancaj! Ružil sam z lancaj i dopęlal dâre z nóvim aotom. Te sam počel del’iti.
Zel sam prvoga pakéta i pozval, po vašomo spisko prvo – puckico. Pital sam jo či znâ kaj popévati i rękla da neče svojoga talenta ręst’epati po takšaj hęrbekaj i to išče zabadav!!
Te sam joj dâval dâra, zapakérane čokolâde i kekse, ali mi je to poš’iknola kręj i rekla ovak:
“- Kaaaj? – Tóóó? – Tó vam jâ nę jém! – Ja sam si mislila ka bom dobila bâr mobitela XW24, li bâr papoče Najkice…ili …gramofóna… Ako to némate, dedek sveti Mikula, te se pišite f šubito i vi i vaši kramposi i tote cukorpekarije!” Brnola se i dišla dimo.
Te sam pręzvâl drugo ime! To je bila žénska f sredjaj létaj, kóli sedemdeset. Jój sam odma ponudil dâra! Ali mi je z rókom pokâzala ka jo to opče ne zanima i rękla ovak:
” – Jęęę, druk Miklóšek!? – Jâ ti to ne jém! Imam šečera okóli petnájst, makar se saki dén pikam! Čé to samo gledim, cukor mi se zdigne na dvajsti! – I ti si mi ga vę zdigel, ka znâš!”
Te sam pręzval jęnoga dečkéra. Totomo sam ponujal škrneclina ze sako fórmo cukori i napolitanki! A on se počel ręgetati kak orslón! Poš’iknol mi je kręj pakéta, pa vel’i:
” – Čujte, kolega sveti Miklóš, pa dé vi živite? Nęznam ęli dohâjate z nęba ili z pekla, ali kaj so tam oni né čuli – kaj se dénes kup’uve na zęmli?! – Jâ sam si mislil dobiti gramofóna z blututom… ili bâr ajfona… Tote cukore tretje klase, tu vam nišči neče néti zabadav!”
Te sam zel pakéta, po redo, za jęnoga starišoga deda, a f pakéto so bili, rud salame, buncek i falat carskoga. Najpredi sam ga pital čé on znâ i čé nam oče kaj popévati! Rękel mi je ka znâ lépo popévati, ali ka mo predi moram dati dvâ litre i dvé vode ili štiri žganice, pa te, čé se mo ofna! Te sam mo dâl pakéta ali… obrnol se kręj, kak da bi mo porinol kačo, pa mi je spočital:
“- Čuj kolega sveti Miklóš, jâ ti imam takšo masnóču f krvi ka mi je skorom pól – pól! Of mesec sam bil več dvâpot f špitâlo na oživlâvajo! Tote maščobe si ti lépo nęsi kam znâš!
Te sam, po spisko, zahačil jęnoga dâra s mešanaj sladobuzaj i męsnâtaj delicijaj i pręzval – jęno žénsko! Mogla je meti kakših slabiših šęzdeset! Lépo sam jo, kak je i red od svetoga Miklóša, prvo pital čé se znâ križati! – Da sam jo to pital, tak me plusnola ka mi je biškopska kapa odletéla na lęšo prti Dol’ičo! Zaz’ijala je: “- Kaj je tębe brige za mojo idejološko orjentacijo? Išče mi je zbajala: “- Toto cukorovje i masnóče, ti nęsi nekšaj gjusa, a né męni štera imam tlaka ober stoosamdeset! I vę si mi ga ti zdigel na dvésto, tak ka boš znal!”
Onda sam si dišel iskat kapo i pajdóč odnot brže bole, fujtnol skup s pakétaj dimo!
Te… ka boš… drugi dén sam rezglâsil ka tote dâre čim predi pręlifram, prodam, ka se mesovje ne pokvâri i ka v sladobuze v dedijovomo vęšteto ne zavudrijo miši i štakori!
Tri dni mi se je na toti oglas né javil néti jęn Deda Mraz!? – A baka Sida mi je rękla ka se ludi po sęli spom’inajo da – kaj jâ délam zótim… F kombi od stričeka Dragija sam naklâl sę dâre, zel sam si megafóna za kričaje po cesti, pęlal se s svojaj kramposaj i po sęlaj i rezglašuval
“Ovde Deda Mraz! Del’im pakéte! Štó gut oče dâra, nek samo zdigne róko, nek samo mâhne z rókom i mi ga vidimo, i odma mo dâmo pakéta! Samo mâhnite z rókom, a ostalo je naše!”
Dugo nas je nišči né štel néti gledati. A onda smo dojšli v neške selo, dé so malo ménše hiže, a puno vęč ga dece! Kak sam to rezglašuval, kóli kombija se nabralo odma – stó dece!! Otpral sam vrâta od kombija i deca so se počela grâbati za pakéte! Hačiti! Te sam ji jâ pital:
“- Dobro dečica, sam si zémite! Ali čujte: jeli je vas tu, ne strâh od šečera ili tlaka ili od masti f krvi … ili ka bi se zdeblali…??
Te mi je jęden stariši dečkér, ki je odnâšal pune róke pakéti, pajdóčki rękel:
“- Čuj gospon, polovica naši jih nęzna ka cukor, mast i dimleno morejo biti opasni za zdrâvje, a za drugo polovico je to sikak né opasno jer, toti némajo od čęga zbętęžati!”
A ovi mali ka so bili okóli kombija, sam so grabili, hačili, nosili i bormeš – sę znosili! Sę je odišlo z kombija kaj gut je bilo nutri: si cukori, sę napolitanke, sę čokolâde, s’i bunceki, s’i kolbâsi, sę salame, do zâdje ščipice, i rezervna gumja, i prva pomoč i… auto dizalica…
