F pondélek je Pepi hodil po dvoro dosta nervozen. Žęna Liza ga je pitala – ki mo je vera. Pepi je i dale hodil sém-tam po kuhji i na glâs meditéral:
“- Zakaj vlâst nęda otprti krčme! – Kaj joj smetajo? – Jedino kaj imamo f sęli je Katina krčma, f šteri pajdašujemo, dé se kulturno zdižemo i spuščamo! – I zakaj vę, toti razbojniki nędajo otprti bâr naše selske krčme?! – To je ciganija i diskriminacija! – To je sramota!”
Liza se zabezeknola dok ga je poslušala! Poględnola ga je poprečki i – grdo zesnâžila:
“- Kaaaj?! – Fal’i ti alkohol?! – Ili morti Kaaata?! – Kaaaj si ovisnik?! – Drščeš za pijačom?! – Sramota! – Da je po mojemo, krčme bi trebalo za nâvik zaprti! – Tak ka boš znal – ti pijânec!”
Pepi se resrdil kak pes na poštara! Ali, né ji je rękel néti réč, sam si je – pogutnol!! Stal se i odma dišel je vu vęštet dé poprâvla bicikline! – Zakuril si je f pęči na pilovino i né je štel iti vum. Né je išel na večerjo, néje dojšel nutri spât! Néti zutra na zajtrek! Néje pólne na obed…
Liza se pólne sela na biciklin i otpęlala se f Čakovec – f Centar za zaštito nezaštičenih! Rękla je da se ji je móž počel čudno ponâšati, da z jóm ne komonicéra, da je mogóče i opasen!
Žénska z Cetra je zvâla Pepija s telefónom. Pepi se je javil. Rękla mo je:
“- Gospodine Pepi, nęsmite se tak izolérati vu vęšteto! Morate se socijalno ponâšati! To je né prihvatlivo! – Istina, nębre vam nišči nika čé mirno f svojemo vęšteto poprâvlate bicikline, ali mi smo – uznemireni radi vas, zâto vas pozivlemo ka zidete vum z vęšteta – med lude!”
Pepi je bil jąko lubeznivi i gospođi je milo ovak rękel:
“- Razmim gospođa! – Zišel bom vum z vęšteta! – Znám da je to né zgodno! Bóm! Bez brige!”
Pepi je odma zišel z vęšteta. Ali Liza, da je dojšla dimo se dale napuhâvala, i dišel je – râvno f podrom! Zapral se f podromo i né se dâl vum! Néje dojšel na večerjo, néti k Lizi spât, néti zutra na zajtrek, néti na obed… Drugi dén, da je minolo pólne, Liza je zajahala biciklina i otpęlala se f Čakovec na Center. Onoj žénski je rękla da se joj je móž zasunol f podrom, i da i inače hajdi pije, a vę opče nejde vum z podroma!? Žénska zótoga Centra je odma s telefónom zvâla Pepija. – Pepi se ji je javil. – Ovak mo je rękla:
“- Gospon Pepi, znova ste se počeli asocijalno ponâšati i mi smo uznemireni. Zgled’i ka pijete!? – Ako odma ne zidete vun z podroma, mogli bi vas ovi naši zaprti na prisilo léčeje od alkohola na – na mesec! – Najte delati bedastóče i zidite vum zótoga podroma!”
Pepi je razmel kaj ga je žénska zvâla. Malo je bil f šuso, ali ji je milo obęčal:
“- Razmim gospođa. Zišel bom z podroma i več vujega nejdem! Bez brige! -Več idem vum!”
Pepi je zišel vum z podroma. Sel se je f kuhji i gledal televizora. Ali se Liza držâla napuhjeno, pa ji je Pepi né štel ręči néti jęno réč! Jesti je sám sębi napravil. Da-pa-da se prešpancéral po dvoro, ali jój je né vóščil néti réč! – Tak do véčera. Spâl je f kuhji na otomano. Néje štel Lizinoga zajtreka. Néti njénoga obeda. Gledal je kręj od je!!
Da je minolo pólne, Liza je zajahala biciklina i otpravila se f Čakovec f Center. Tam je povedala sę kaj je méla, a ova žénska z Centra je odma zvâla Pepija, pa mo je rękla:
“- Gospon Pepi, néje dobro! – Vaša suproga se žali ka jo zapostâvlate i zanemârjate! Prti jój se ponâšate asocijalno. Moglo bi se dogoditi ka vas se tóži i prisilno odsęli z hiže na pâr meseci na léčeje – kak onoga šteromo se zvórdalo! – Pazite kaj délate, ka nate završili pod klučom!”
Pepijo je bilo dosta nerodno, a bormeš ga je tota gospođa natirala v brigo! Pital jo je:
“- Gospođa, pa nič joj ne délam! – A kaj bi zapraf, móral delati ka bo vam praf?”
“- Čujte, gospon Pepi, mórali bi svoji suprogi povedati lépe réči! – Mórali bi jo gledati, spominati se z jóm i da-pa-da ji dati komplimente, na njéno finočo, na fórmo, na jén izgled, dobroto! Mórali bi joj povédati neka ka bo jo respoložilo, dopalo joj se, neka privlačno…”
“- Dobro gospođa! Bom ja to poriftal! Znám ja kaj ona narâjši čuje! – Bez brige! Bó tak!”
Da je Liza dojšla dimo, Pepi jo je počakal na šténgaj i nadelil z šęregom lépi réči:
“- Mišek mój, si se vrnola? – Joj kak si se lépo oblékla, ribica moja! – Tota robača ti najbole paše smokvica drâga, jer se na joj vidijo tvoji lepošnâti sóvoji! – Dobro je i ka ti je malo prekrâtka, ka se lépo vidi kak si bogâto rezmętana, mujcek mój! – Znâš picika zlâtna, kak so mi – s’i okólni dedi jâlni da te gledijo kak luka sad’iš!? A čul sam i ka fučkajo za tobom da se pęlaš na muškim biciklino, pekmosek mój! – Da dohâjaš dimo, bole se ti vesel’im kak pénziji, žabica moja! – Te kóma čâkam ka se skmiči, jerbo f kmici si mi išče najlepša, mój cukorek!”
Išče ji je nadelil hajdi komplimęnti, a v noči ji je né dâl spati, tak ka jo je duš’ilo! V jutro ji je povédal kak je i kajava i zašulana lépa, a stopram da se napâca i nasafta z dihâljom i z svojim mâščama! Šacal jo je i furt i vdilem ji povédal kak je lépa tučna, spametno jez’ična i elegantno frčna!”
Da je minolo pólne, Liza je zajahala biciklina i otpęlala se f Čakovec f Center. Oni žénski je povédala – sę kak se ji Pepi rivle. Rękla je da je to né za zdržati, da bo ponoréla…!
Žénska je odnod, odma zvâla Pepija:
“- Gospon Pepi, ne piše vam se dobro! – To kak se vi ponâšate nav dobro završ’ilo! – Mogla bi vas milicija odma otpęlati i preprti, ako se tak nastavite ponâšati!”
Pepi jo prestrâšeno pita:
“- Kaj gospođa, kaj sam vę napravil nâpak?! – Kaj krivo délam?”
Tota gospođa mo je onda rękla:
“- Gospon Pepi, to kaj vi délate je dénes najbole opasno! – Nagrâža vam se ręšt! – Za to vas se more zaprti i na šest meseci! – Vaša suproga vas tóži za spolno uznemirâvaje!”
Pepi je ftihnol. Zapral je telefona. Odma se je odsęlil vu vęštet.
