Đura je išel f Čakovec i kupil si je bukso z dvâ prédole: jęnog za evre, a drugoga za kune. Zvun toga buksa mo ima dvâ velike žępe, jęnoga za želézne kune i lipe, a drugoga za želézne evre i cente. Da nęse toto bukso, vâže ga i zanâša. Ludi so mo spočtâvali:
“- Đura zakaj némaš péneze na banki i s kârticom bi plâčal: z jęnom žęna a z jęnom ti?! – A né ka ze sobom tel’eščiš totoga nezarénskoga kobelâra? Dénes céli svét plâča s kârticaj!”
Đura jim je otprto povédal:
“- Nečem! – Dogovorili smo se z žęnom ka več nečemo kârtice! – Da gut smo si i od koga gut smo si zeli kârtice, vék so nam porinoli i – dozvolenoga minosa! – Navék so nas nahujstili! – A, f poveréjo, moja Sida, čim navoše dozvolenoga minosa, to jó potegne ka troš’i tak dugo – dok ne pâdne f takši minos ka jo néti vatrogasci ne potegnejo vum! – Ona nębre péneze šparati néti dva dni! – Móm vudri doli sę – kulko se po kârtici more! – Vę, kak so dojšli evri, jâ sam – sę kârtice skuril i nečemo jih več, néti Sida néti jâ meti i – šlus!”
Pajdâši so mo dopovedâvali da je plâčaje s kârticaj sigorno, praktično… ali:
“- Nečem i šlus! Razmite, néje to zaradi męne, nego radi moje Side! – Ona – nęzna šparati!”
* * * * * * *
Of četrtek pred Trima Krâlima, so Đura i Sida išli f Čakovec. Išče so meli nekše kune i lipe i – ka to vudrijo doli. – Hajdi toga so nakup’uvali, jer se po svetkaj dóma hajdi toga i potroš’ilo. Nó, nazâdje je Sida išče obrnola v robno kučo “VAŠA”, po špecaraja. Đura jo je v aoto čakal. Za vuro i trifrtâl Sida je dobejžala vum:
“- Đura, dęj zmori negder štiri i pól evre, jer to sam na blagajni ostâla dužna, pa ka to platim i ka zdignem i dopęlam robo s kólcaj v aoto!”
Đura se stępel! Počel je drbati po žępaj, pa v buksi sę prédole…:
“- Némam! … Čâkaj… čé bi tu… né… ili ój… â imam pedęsetko kuni… ali to sam kánil …. da pemo dimo f krčmo k Kati … na žganico s čajom i ajer-kojak… – Na idi to nęsi…. i plâti!
Sida je plat’ila, nekaj robe so ji apcigovali, tak ka je rečun bil poravnani. Dorivala je kólca k aoto. Zmętali so robo pod haobo.. Da se sela v aoto, Đura ji vdilem po póto namétal:
“- Pa kaaak si mogla sę potrošiti do zâdjega cénta?! – Sręča je ka f tork poštar donęse pénzijo, drugač bi, krę tebe..!? – Kak moreš tak frčkati péneze! – Kak moreš biti tak râsipna?!?”
Sida se žereče fpirala:
“- A koga boš jel – čé namo kupili… sól, cukora, melo… štónfe… – I čula sam jâ ka sę-po-sód okóli lampaš kak jâ restéplem péneze, kak jâ nęznam šparati, kak jâ rezméčem?! – Naj me več potvârjati pred drugaj ka sam rezmetl’iva i ka nęznam šparti! – Ti restépleš bez ręda: čiki, krčma, utakmice… nov’ine!? Boš vrę videl! – Jęmpot bom ti tó sę déla pod nós! – Ti #$%&$ !”
Dale, do dóma je bila “tiha meša”.
Da so dojšli dimo, na vrâtaj, na verandi so jih poč’akali sósedi Pepi, Drago i Fęri:
“- Dober dan gospon Đura. Mi smo aktivisti enka “Transaprentnost” Glavatišče. Hodimo pobirat članarino i dobrovolne priloge za klub, za kupuvaje igrâči.”
Đura se malo zbunil:
“- Nó, je… vę je toto vréme… – Pa po kulko ludi dâvlejo… ka se znám ravnati…”
Rękli so mo:
“- Pa za letos dâvlejo po stó kuni ili trinájst evri… Ali ti si Đurek né platil za lajsko leto… pa te čé bi vę… – I znâš, od tębe kak od jęnoga – vekšega f sęli, očekivlemo ka boš se skâzal…”
Đura jim je rękel:
“- Okej dečki! … Te to f kunaj … ili v evraj… kak morem…?”
“- Đurek, kak očeš, nam ti sę paše, sę na svéto…!”
Dobro, dečki! – Malo počâkajte. Sędite se na verandi. Odma … sam ka se resprâvimo!”
Dišli so nuri i Đura se – stiha ali žereče zahrkâval na Sido i namétal ji:
“- Kaj bomo vę? – Pitam te, kaj bomo vę? – Si vidla kaj si napravila?! – Ti rasipnica!”
Te se Sida zravnala, podbočila, fprla prsta vu jęga i ovak mo je rękla:
“- Jâââ rasipnica? – Jâ rezméčem?! – Zapamti si – išče negda so me – od moje mame mamica, nafčili ka tre vék meti srájene péneze za mogóče črne dneve i teške vure i za najvekšo silo! I – tak ka boš znal, jâ šparam kak mrâvla – ka te spasim čé sporadi tębe ostánemo čista švorc i v nevóli…! I to sam dovezdar skrivala od tębe, ka ti… kakši si… naj i tó, f krčmi…!”
Onda se žurila na nâjže, potegla se med rórom i heklinom, zavlekla róko pod črép pre kukmi pod roženico i odnot zvlekla škrneclina – punoga penez! – Dojšla je pred Đuro i gizdavo srd’ita pred jęga hitila – pun škrneclin penez!
“- Na! – Tu ti je – od “męne rasipnice”! – Ka me več nigdâr naš olajâval ka sam rezmetl’iva, ka sam rasipnica, ka frčkam i ka nęznam šparati péneze!”
Đura je zgrabil škrnclina i odbejžal na verando dé so ga ovi čakali! – Na stolek na verandi je pred jih, na kup sipal péneze z škrneclina!
Pepi je gledal tote péneze! Te pa Đura! – Pa Drago! – Pa Đura! – Pa Fęri! Te pa jęn drugoga…!
Na stolo pred jimi je bil kup pen’ez! – Dinari! – Béli i žuti želézni i papérnati! – Petače, banke, dvajs’dinarke i za jęno biročko želézni po dinar, dvâ, pet i po – pet i dęset i dvajsti para…
