Đurin vnuk Joška, Dragijov Mirko i Pepijov Francek so se zravnali f srédo f Čakovec na séjam – na kolbâse. Jožekov Bemve, šteri je dęset lét stariši kak on, je né pręveč siguren jer je več dvâpot zavustal na Magistrali pre Fikšâjbi – ka je né mogel gori na nadvožjâk.
Jožek se šmajhal okóli dedija Đure i … počel ga je fehtati:
“- Dedaaa, a bi ti nam malo posódil svojega Golfa… sam do Séjma i nazâj? – Čé nam posódiš, mi bomo ti ga natankali do punoga! – Mooože?”
Đura je bil dobre vóle i slab s pénezaj. Rezervâr mo je bil na nuli, a pénzija dójde stopram f srédo. Malo je sklimâval z glâvom, poględnol v nębo, poględnol aota, čóhal se… pa jim veli:
“- Dobro Jožek! – Dám! Ali, ka bóte od réči: napunite rezerevâra i ka bote do pólneva dóma!”
“- Deda, pa znâš ka smo mi navék od réči!? – Bez brige bodi!”
Dečkéri so se naklâdali v Đurin Golf, a baka Sida je dobejžala vum i dečkéraj ovak vel’i:
“- Dečki, preslabo ste se oblékli, a zima je! Več je né kak je bilo kóli Nóvoga leta, da bi – lęfko vuni hodili f špilhozaj! Zémite si duge kapute ka se ne namrznete!”
Dečkéri so né pręveč mârili za bakino povédaje:
“- Ęęęh baka, kakša zima?! – Tak je kak i sę druge dneve. – Mi smo v Enka Glvatiščo več počeli s treningaj i célo odvečerko smo sam v gačaj i vęčpót nam je išče – prevróče!”
Baka se né dâla potrti! – Dečkéri nęznajo kak se se dénes vréme more nanâgloma preobrnoti:
“- Dečkéri, bógajte me! – Dénes je Preobrjeni Pavel! – Na den’ešji dén se sę lęfko preobrne! Paaazite kaj vam povédam! – Najte se igr’ati s Preobrjenim Pavlom!”
Dečkéri so se norčlivo nasmij’ali i velijo baki:
“- Je, je, je baka! – Idemo se mi obrnemo f Čakovec, pa tam obrnemo štiri porcije kolbâsi, pa obrnemo nešternoga litra, ka – dámo smisla totomo – dnevo Preobrjenoga Pavla!”
Dišli so. Dugo ga ga jih né bilo dimo.
Okóli pol dvéj so stopram dojšli! – Baka Sida je dobejžala vum pręd jih:
“- Dooojšli ste!? – Ste se né namrzli? – Vuha so vam sréšnata! – Hote nutri ka se zgréjete!”
A i deda Đura je dobejžal vum! – On se móm zaputil k šaltâbli – lukat na cajgar od rezervâra:
“- Dečki, ste mi natankali benzina – kak smo se pogod’ili?”
Jožek mo je tomâčil:
“- Deda, jęsmo! – Natankali smo ga do vrha! – Poględni â, tu ti je rečun, čé ne verješ…!”
Đura je dugo lukal na vuru pod volanom… gledal, nagijal se lévo, désno… i vel’i Jožeko:
“- Jožek, pa – prâzen je! – Kak veliš da ste ga natankali do vrha, a v rezervâro, kak piše na vuri, ga ga né néti kaple benzina!? – Kaj ste nekod blódili i sęga potroš’ili? – Ili mi lažeš…?!”
“- Deda nésmo nikod blódili i jęsmo ga natankali – do punoga, ali je – sę steklo vum!”
“- ?!?”
“- Deda, točno je tak bilo kak ti vel’im! – Da smo išli tâ, natankali smo ga na štrih! – Ali da smo se pęlali dimo, i točno tak … kak je baka Sida poštęno rękla – ka je dénes dén Preobrjenoga Pavla, i ka se dénes sę more prebrnoti, i mi smo se… te tak… na zavojo za Facarnicom smo – malo zlet’eli doli s ceste, pa smo se malo preobrnoli – na krov… i te je … kak se je aoto bil na krovo, ves benzin z rezervâra stękel vum…!”
