Od dénes krčme sméjo prodâvati “kofi to-go” ili kâvo za vum a i duge pijače za vum, a isto tak morejo prodâvati i jestvino za vum.
Krčma “Kata – rajska vrâta” déla je na zvunašja vrâta plakata na šteromo piše:
“Svoje céjene goste obaveštâvlem da od dénes, od Fašinskoga pondélka, vaša premila krčma “Kata – rajska vrâta” sponova diše. Obaveštavlem vas da od dénes morete kupiti i nęsti si vum sę vrste pijače: kofi to-go, gem to-go, šus to-go i sę kaj tęče to-go! Isto tak vas obaveštâvlem da od dénes, saki dén za vas preprâvlam i jestvino za vum, a dénes nudim – peko za to-go!”
Đura, Pepi, Drago i Fęri zględali so totoga plakata i poružili Kati po obloko:
“- Katicaaa, kaj to dénes imaš tak dobroga za jesti, za to-go? – Fčęra smo nikaj žęnaj za Valentinovo né kupili a k tomo, ove Fašijske dneve smo mi dedi godovjâki …!
Žęne so nam dénes dišle f Čakovec po kvâsa, kak je to red, pa bi bilo faj ka jim preprâvimo iznenađéje da se vrnejo dimo – ka se si skupa malo počastimo!
Katica je, vesęla ka znova vidi svoje stâlne goste, vesęlo zagugutala:
“- Dečkeciii, imam pijačo kakšo očete za to-go, a za jestvino sam dénes prepravila neka špecijano, neka fino, dišeče, spod peke, za vas kak stvorjeno!”
“- Katicaaa, a kulko košta tota špecijalna jestvina?”
“- Čętrdeset pet kuni!”
Dečki so se onda fkróg poględnoli, sklimali z glâvaj i Đura je vu ime sih jih rękel:
“- Dooobro Katica! Dęj nam déni na stráno štiri porcije jestvine i … dęj nam štiri gemište!”
Dečki so si odnęsli gemište vum na škârpo i tam pili i spominali se. Gemište su začas spili, pa je Đura rękel dečkima:
“- Dečki, počâkajte, idem jâ donęsem išče štiri gemište!”
Dišel je pred oblok od krčme i zęzval Kato:
“- Katicaaa, dęj nam išče štiri gemište … i čuj … kak je ona jestvina, ka smo kupili i ka si nam jo predi déla na stráno, za to-go? – Bo to dobro? – Je sę v redo?”
Katica mo je donęsla štiri gemište, naplatila i rękla:
“- Đurek, bez brige, sę je vredo i sę bo vredo! – Ja sam na sę mislila!”
Đura je odnęsel gemište, na vulico, dečki so pili. Da so spili Pepi se zagnal k Kati:
“- Katicaaa, čuj, dęj nam išče štiri gemište … i čuj, kak je ona špecijalna peka za to-go, štero si nam predi déla na stráno? – Bo to dobro? – Bó sę vredo?”
Katica mo je dâla štiri gemište za to-go, naplatila, pa mo veli:
“- Pepi, bez brige, sę bo v najbolšemo redo! – Na sę sam jâ mislila!”
Đura je odnęsel gemište za to-go i dečki so pre cesti pili. Te je na redo za platiti bil Drago, te pa Fęri, pa znova Đura, te pa je zvâl Drago, pa se red pošemeril… I saki je išel na oblok krčme, naručil, platil i pital – kak je jiva jestvina štero jim je v jutro déla na stráno… I Kata je sima rękla da je – v najbolšomo rędo, da je ona na sę mislila i – da naj bodo bez brige!
Dénes, da se več počelo kmičiti, dečki so spili kaj so kánili i odišli s pred oblok krčme:
“- Katicaaa! – Smo ti kaj dužni? – Čuj, dęj nam ono jestvino za to-go, štero smo zjutra naručili i platili, ka vę odnesemo svojim žęnicama!”
Kata se dožurila na oblok s stiri najlonske vréčke! F sakoj vréčki je bila jęna zdela! Veli jim:
“- Dečkeciii, to sam vam prepravila sakomo jęno puno zdelo! – Paaazite ka ne potęrete do dóma! – Prepravila sam vam – hladnetino pod pekom! – V jutro sam bónceka spękla pod pekom, a v lonco skuhala kóže, pâžle, repe i vuha, i onda sam to se kupa zméšala i nalijâla v zdele! Bodoči da jâ poznam dobro svoje mošterije, pa tak i vas, znala sam da, od kak to f krčmi naručite, pa do onda da pete dimo, hladnetina bo se najlepše – sela!”
