Prinas so od negda na snâgi takši zâkoni ka so pred svetkaj velike stiske po štacunaj, a – po svetkaj so velike stiske – pre doktoraj.
Đuri se po minolaj svetkaj šemerilo v glâvi, kmičilo pred očima i žalódec ga je naduval.
Povédal je to i svojaj pajdâšaj Dragijo, Pepijo i Fęrijo. Dečki so mo rękli:
“- Đura kaj čâkaš?! – Idi k svojomo doktoro! – A za kaj jih imamo?!”
Đura je on petek po Nóvomo leto dišel k svojomo doktoro.
Doktor ga je preględal, zmeril mo je cukora, tlaka, mast, sklimâval z glâvom i prepisal mo kup tableti: za cukor, za masnóčo i za tlak.
Sida je išla z jim f Čakovec, ka je pajdóčki po štacunaj restępla nekaj pen’ez.
Da so saki svoje zbavili i zišli se v grâdo, Đura ji je povédal kak je bilo pre doktoro, kaj mo je doktor rękel i pital jo je po šteraj štacunaj je ona hodila i kaj je kupuvala:
“- Kupila sam štiri kile cukora, dvé kile soli i dvâ bunceke, – tak so lépe meli, a vę so fal! I zela sam tâblo špeka i kotâča špekarice, ka bomo meli dóma, pre róki, čé što strajski dójde.”
A onda se obrnola prti Đuri, fprla prsta v jęgov nós, pa mo je ovak rękla:
“- Aaali, to je né za tębe! – Ti to nęsmiš! – Ti imaš tlaka, imaš cukora, imaš masnočo! – Tębi bom jâ prepâvlala posebno košto! – Jâ znám kaj ti sméš, a kaj nęsmiš jesti!”
Đura je išel dimo tožen kaj da so mo gorice pozeble! – Vohal je kakša ga to košta čâka!
Ali, kaj je – tu je! – Zęzval je pajdâše, Dragija, Fęrija i Pepija i tóžen jim nazvestil:
“- Drâgi deeečki, dojšli so žalosni cajti. Odvezdar več nęsmim piti, né jesti naše fine hráne! Bil sam pre doktoro! – Imam visokoga tlaka, cukora i masna jetra! – Dâl mi je céli kup tableti! – Drâgi prijateli, gotovo je z našaj partijajaj i pečejaraj, z tiblicaj i bóncekaj, gemištaj…!”
Dečki so mo rękli ka krivo govori, ka je to né tak:
“- Ti se Đura opče ne razmiš f modęrno medicino! – Prepisal ti je tablete! – Je tak? – A za kaj se dobijo tablete? – Zâto ka s tabletaj moreš dale jesti i piti sę ono kaj si predi jel i pil! – Jer čé bi se okrâjal od sęga kaj si dovezdar jel i pil, onda ti je tablete – opče né treba! – Pa zmisli se kak so negda pokójni Karlek, pa pokójni Đunđekov Ivo, pa pokójna Husincova Aga!? Makar so meli sę tote betęge, pili so i jeli sę živo, s tabletaj nazmes, i to do zâdje vure!”
Te je Đuri odlehnolo.
Dojšel je f kuhjo. – Sida mo je na stol prepravila blédo juhico s pâr rezanci na pučini, s štiri zâglozde mrkve, s šplahutom petrožola, kupom cęlera i – puste béle žgánce! – Za pijačo mo je ponujala kupico ciklinoga soka ili sirotko, kaj si zbęre!
Đura se resrdil, zgrabil je tajére z totom jestvino, sipal na kup i kričal:
“- Tóóó? – Tóóó bom jâ jel? – Totoga popârjenoga drača! – To si ti dęj peso! – Pes néma dobre pajdâše i néje informérani kak jâ, jer je na lanco i jęmo je moči sę podvaliti!! – Naj pes to jé i naj durne! – Ali jâââ, jâ imam dobre pajdâše pa sam dobro informérani! – Ręči ti męni Sidika, zakaj ja pijem tablete? – Valda zâto ka te morem bez brige jesti i piti sę kak i predi!? – Jer čé bi se okrâjal od sęga kaj sam dovezdar jel i pil, onda mi je tablete – opče né treba! – Zâto, zâdjipot ti velim, nęsi to spred męne peso, naj j’é i durne, drugač bo #$%&%$#…..!
Męni dęj ono kaj je ostalo šunke, kolbâsi i bónceka. – A na špricar pem vum z dečkaj!”
Sida je pokórno pobrâla nakupčano jestvino i odnęsla peso! – Pes je pojel.
Toti tjęden pred Trima Krâlima Đura je saki dén mel novolétno prveščéje. Tamanil je mesnâto, masno, slatko, a z dečkaj je to zaléval z dobraj špricaraj. Nazmes je pogutâval tablete za mast, za cukor i za tlak. I tjęden dni je to išlo – kak spâda!
Of petek mo se počelo v želóco vórdati, pred očm’i kmičiti i v glâvi šemeriti! – Onda se jęmpot sfrkal i scurel skup! – Sida je zvâla črlénoga križa. – Dojšli so i otpęlali ga f špitâl.
Doktoraj je sę povedal – kak je bilo, kaj mo je jęgov doktor rękel i kaj so mo rękli pajdâši.
Zadržali so ga f špitâlo. Tam je dobil za jesti precéjeno blédo juho, štiri suhe žgánce i dvâ zepráne liste šalâte. I vuto fórmo tam ima košto saki dén.
F soboto so ga v bolnico dojšli glet, žęna i pajdâši, Pepi, Drago i Fęri.
Pajdâši so mo v dvâ pakete donęsli domâčo hráno:
“- Đurek, kaaak si?! – Si dooobro? – Tu smo ti â donęsli ka se malo objéš, jer známo da tu pręveč dobro ne hránijo! – Ęm se na tebi vidi ka si shudel! – Tu su ti suhi jez’iki, malo tiblice, narézani buncek i rud narezane somarice. Kruha si friškoga tu kupiš…”
Đura je to zel i dečkaj je rękel:
“- Drâgi moji prijateli, fâla vam lépa! – Vi ste za istino prâvi – dobri pajdâši!!”
Onda je só toto jestvino, kaj so mo jo dečki donęsli, pred jimi rezmotal i sę skupa sipal v najlonsko vrečo f šteri mo je Sida donęsla papoče. – Sidi je dâl to z vréčkom, pa ji veli:
“- Sidika, prosim te, odnęsi to sę skupa dimo našomo peso Bandijo! – Ręči mo ka se mo izvinjâvlem ka sam ga zâdji pót tak grdo ovrédil, ka sam ga z jestvinom z stola vurčil ka bo na lanco durnol! – Ręči mo da mo prepuščam dâra od svojih dobrih pajdâši, jer znám da on néma dobre pajdâše, ali je né na tabletaj, jer je na lanco! – Ręči mo, da naj ne žaluje ka néma dobre pajdâše i ka je na lanco, jer je vę męni žal – ka sam jâ ove dneve – mel dobre pajdâše i ka sam jâ ove dneve – né bil na lanco! – Ali, ręči mo, da je to pre nami ludima tak: ka saki čovek mora meti dobre pajdâše, jer drugač ga néma štó – v životo nasamariti!”
