F četrtek je bilo Télovo. Kak i sako leto, po Glavatiščo se je od kapélice organizérala velika prošęcija, f šteri so f prvaj rędaj išli Đura, Pepi, Drago i Fęri, a odzâdi med žęnaj, jive žęne..
Krčmarica Kata je svoji krčmi “Kata rajska vrâta” organizérala za toti dén zâbavo z živom mužikom – od pólneva nadale i z velikom pečejarom!
Đura i pajdâši so pred Télovom hodili f krčmo k Kati i ona jih je furt nagovârjala ka – naj ręčejo župniko ka jęnoga oltâra za Télofsko prošęcijo déne na srdino sęla. Tak bi onda céla prošęcija išla mimo krčme i vidla bi plakate ka je tu zâbava, i vidli bi ludi ka igra živa mužika, ka se vuni vrtijo odojki i ka se kuri i f kotlima pęčejo krmenatlini i kolbâsi.
Đura i Pepi so f tjedno rekli župniko kaj jim je Kata rękla i odma so mo preporučili ka toto babo ne posluša, jer bi prošęcijo štela iskoristiti sam zâto ka bi si z jóm reklamérala zâbavo! “Da bi joj bâr zâbava prepâla” so rękli i Đura i Pepi i Drago i Fęri!
– Župnik jim je rękel ka je plan z oltârima za Télovo tradicijonâlen i da se to nębo méjalo.
Te so morškârci i dóma svojim žęnama rękli kaj jim je krčmarica Kata rekla, kaj jih je prosila.
Žénske so zakričale:
” – Kaaaj?! – Tota felišęga! – Kaj bi ona štela?! – Jo je né sramota! – F cirkvo ne hodi, a prošęcijo bi si skoristila za svoje ponorévaje!? – I na cirkvi oče šeftati! – A néti se nęzna prekrižiti! – Céle dneve sam dóma sed’i i f kupice luče! – Tota …”
Na Télovo je bila prošęcija kak i navéke dovezdar.
Meša je bila svečana i s prošęcjom je dugo trajala.
Po meši so se ludi zaputili dimo. Bilo ga ludi na vulici kak f prošęciji! Stiska. Puna vulica!
– A onda …! – Zlijâla se ploha! – Déšč kaj prótje! “- Treba pobeči! – Kam?!”
Prehâjali so róm pólek Katine krčme!
“- F krčmo!” – S’i so pobegli nutri f Katino krčmo, tak ka je bila stiska! – Posęli so se dé je što zgrabil mesto! – Krčma je bila puna kak jęjce!
Đura, Pepi, Drago i Fęri z žęnaj so zahačili veliki stol! – Déšč je curel kak za péneze.
Naručili so si pijačo … onda i krmenatline … i kolbâse … pa i litra i vodo, pa išče jęnoga…
Onda so “Črne stréle” zaigrale. Kata je pred Đuro, pajdâše i jive žęne donęsla na stol litra, vodo i nekše prfkače:
“- To vas kuča časti! – To vam je zâto ka sam dénes méla takšo sręčo ka se mi je vęč f pólne, napunila krčma! Sigurno ste za męne i za mojo zâbavo, f cirkvi nekaj – zmolili da je tak dobro ispalo?! Saka vam čast! – Jer jâ sam céli tjęden molila – ka dénes naj bil déšč!?!”
