F petek so na vulici Đura i Sida pre svojaj pótnaj vrâtaj i Pepi i Liza po svoji ogradi pobirali reklame, pa se Pepi žali Đuri – da so tote reklame – né za zdržati i nikši hasen, samo kvâr!

Đura mo je rękel: “- Néje to bez hasna! – Jâ sam róm gledal reklamo, dé “Bor” z Nóvoga Marofa déla strašno lépoga hrastovoga meblina. – I fal! – Cela prva hiža – za sędem jez’er: dvâ ormâri, postela, stol, dvâ stolci, dvâ nahtkaslini i psiha … Samo tre meti péneze! … Ali dâjo i na kredit! …. – Čuj Pepi, bi mi ti bil žirant, čé si nóvoga meblina očem zeti na kredit?”

Pepi je poględnol Lizo, pa veli Đuri: – Čuuuj … znâš kaj, nębrem … več sam j’e žirant …”

Đura mo je rękel. “- Dooobro, naj bo … bóm vre nekak …!”

Dénes v jutro Pepi zove Đurija: “- Čuj Đura, si čul ka so nam pénzije zdigli dvajsti posto gori i to za šest meseci nazâj!! – V banki je isplata! – Sima! – I z zaostâtkaj! – Moreš iti v banko i Lubica bo ti nabrojila péneze! – Jâ sam si več zdigel – šesthiladištiristosedemnájst!”

Đura mo vesęlo vel’i: “- Jeee?! – Saka čast! – Móm si bom kupil meblina v Novomo Marofo!”

Za vuro i pól zove Đura Pepija: “- Halo Pepi! – Tu sam v Novomo Mafofo. Platil sam akontacijo za meblin dvé hilade, kulko sam mel svoji penez, a za ovo drugo sam jim rękel ka bom platil po rečunu, v Nedeliščo, z banke, od pénzijonérske povišice! – Ali, velijo mi da ga ga né bilo nikše povišice pénzije, jer da bi to bilo, te bi i oni tu v Marofo znali …!?!

– Pepi se sméjal kak da bi bogec tórbo restępel: ” – Prvi apriiiil!”

Onda mo Đura povéda dale: “- Je, dobro – to za prvi april … Ali jâ sam vę platil dvé hilade akontacijo i zebral si hrastovoga meblina: postelo, ormâre i stola! – I vę némam péneze ka bi to platil, jer sam rečunal na povišico pénzije kak si mi ti to rękel! … – Vę so mi rękli da toto razliko morem platiti na kredit! – Rękli so da mi dâjo na dvanájst rati, samo moram meti – žiranta mlajšega od 65 lét! – Vę bi ti Pepi móral dojti sém, ka mi kak žirant potpišeš za toti kredit, drugač mi prepâdne akontacija – dvé hilade! – Pepi, zémi si sobom odreska od zâdje pénzije, lično kârto, jmbga, ojba i tridęsti kuni! – I Pepi, prooosim te, žuri se!”

Liza je bila pólek Pepija. Sę je čula. Poglednola ga je kak da bi zahuzal célo pénzijo:

“- Te vrâk i tębe! – Ti je to trebalo?! – Nazâdje bomo išče splâčali Đurinoga – kęrdela!?!”

Pępi je zeštrptal z ramenaj, nabral si je dokomęnte, sęl se je v aoto i tpęlal – v Novi Marof!

Došel je v Novi Marof, f tvornico “Bor”. Po kancelarijaj je pital dé je Đura!

– Rękli so da ga ga tu né bilo nikšega Đure … da tu ne dâvlejo nikše kredite i da nęznajo nič!

Onda se je Pepijo – presvétilo!

Pęlal se je dimo i po póto je z mobitelom zvâl Đuro: “- Đura, sę mi je jasno! – Naj bó, dobro si me predelal, bâr sam videl Novoga Marofa! – Ali mi itak ręči zakaj si mi rękel ka si ze sobom zémem – tridęsti kuni?!”

Đura mo vel’i: “- To ti je drâgi prijatel, zâto ka boš tu, dé te jâ čâkam, platil – poreza na hrmâke! – A jâ te čâkam f krčmi “Kata – rajska vrâta”!