Žénske so se v jutro zišle na kâvi pre Sidi (dedi so dišli – ki kam).
Čim so spile žganice (kâva se hlad’ila) Liza je z široko otprtimi očm’i prignola glâvo i ovaj trimaj (ka nišči nav čul) šepet’urila:
“- Puce, ste gledale naše “Let tri” na Evroviziji? – Jâ sam gledala … i kaj bo gut štó rękel, męni so bili super! – Makar sam sáma gledala, na mâhe me bilo malo srám to gledati, póseb da so se tam v gačaj kotali! – Ali, na televiziji so rękli ka je to dobro antiratno…! Valda te…?!”
Te je Liza povédala svoje:
“- Bormeš je! Čuj, i męne je bilo malo srám gledati! – Ali na televiziji so rękli ka je tota “šč” popéfka lubavna – sam ka mi to ne razmimo! – To je lubav po Istambolski konvenciji. Bómo se prifčili tomo kaj smo si zebrali! Vę nas to trenérajo mali podli krokodilski psihopati! Oni so modęrni pa prakticérajo ono kaj se je zvum šekreta v naši civilizaciji, predi – ne kâzalo, ka bo vę to normalno! – Tomo se malo tęžiše privučamo, ali se bómo! – Vrę!”
Jula je kóma čakala ka dójde na red i ka pové svoje:
“- Morem vam ręči puce da sam štrptala – kak bo vo finalo! – Ali takâj tak me je bilo srám gledati jive riti črez bóge gâčke! No, na radjo i na televiziji velijo da je to umetnost, sam ka mi to ne razmimo… Treba je to tak razmiti kak oni razmijo, a né tak kak mi razmimo!”
Te je išče i Ilka povedala svoje:
“- Bili so super! – Ali jâ sam sramežl’iva i drugder to nębi vupala gledati, ali róm čé si dóma sám i sám glediš…?! – Âk so fést dedi, sam … tote unternice..?! Drugač so super! – Tak so i rękli na televiziji oni – štere so si oni z televizije zbrali i pustili ka povéjo za televizijo!”
Žénske so zrękle da bi bilo dobro od toti “Letofci” kupiti nešterno pločo ili albuma!
Te je Sida zgovorila ka róm dénes pólne pęla šalâto ščerki Zdénki f Čakovec i ka jim pajdóč more kupiti albuma ili cedeja od Letofci! “- Super!” – Saka si je naručila jęnog ili dvâ albume:
“- Sidika, na tu ti je foršus i … čuj … Stiha! – Naj to nikomo povédati … Ka se ne zazvedi…!”
Sida se pólne otpęlala f Čakovec. Najpredi je obrnola k Zdénki s šalâtom. Čim je dojšla na jiv grunt, móm je vidla ka je pre hiži – nekaj né po redo:
“- Kaj je Zdénka, kaj si tak nekša huda, respigana?”
Zdénka ji je nutri stiha povédala:
“- Čuj, naj nikomo povédati, ali malo predi me je zvâla Kadirova teta z Vrtiča i rękla mi je ka bodo maloga Kadira morali vrnoti vum z vrtiča. Naj ga – do odloke več ne pošilamo vu vrtič!”
“- Jeee? – Pa zakaj? – Kaj ne plâčate? – Ili dečkér bije teto? – Ili déla nasilje puckaj… ili kaj?”
Zdénka ji je išče bole stiha rękla ovak:
“- Nika od toga! – Nego dečkérec rad popévle! I da je gut odmor, on onda fést na glâs popévle, krč’i popéfke od onih “Let 3″! – Dale ti nika nębom povédala… jer me je srám!”
Sida ji je zmâhnola z rókom, naj se ne briga:
“- Ęęęh, ne sekéraj se! – Pa i jâ sam tote Letofce poslušala! – Nega tu nikaj neporednoga! – Pa oni, kak mužikâši stvârjajo nóvo muštro života! Popévlejo antiratne, protiv putinofske popéfke! Tak vę vel’ijo i na televiziji! – Jive popéfke so hasnovite za morâl i odgoj dece! Dečkéra bi mórali pofâliti a né keštigovali! – Ne bój se! I toti vó vrtičo bodo dojšli k sęj!”
Sida se od Zdénke odžurila f knižaro. Da je stâvlala biciklina pre Šoko, zišla je gospođo Mârtico ze šterom se vęke shâja f cirkvi f Čakofco, a na proščéje obično po meši ide k joj na kâvo. Réč po réč, zazvedile so ka i jęna i druga idejo f knižaro, Martica po nóvoga molitvenika, a Sida po – “nekše ploče za kolegice”!
Dojšle so f knižaro. Nutri stiska. Ali čim so se pokâzale na vrâta, trgóvec je Sido pręzval:
“- Izvolite gospođa, kaj nucate?”
Sida se malo zlęcala, oględnola se okóli sębe, pa pita trgófca:
“- Kaaaj? – Pa, jâ sam né na redo! – S’i ovi ludi so predi…. i gospođa Mârtica je pred męnom!”
Trgóvec (nekši lampasti) ji je lubezno i glasno kričal:
“- Gospođa, vi ste prva na redo, jer s’i ovi drugi čâkajo na robo po štero je inoš odišel v magazin, pa te da donęse bodo oni na redo! – Izvolite!”
Sida se išče jęmpot fprla i tomâčila trgofco:
“- Gospon trgóvec, čé je i tak … â, gospođa Mârtica je sikak pred męnom, ona je prva bila!”
Trgóvec je s pulta znova lubezno kričal Sidi:
“- Gospođa, vi ste na redo! Jâ pâzim i dobro vidim kak ide red! – Bez brige! – Izvolite!”
Sida je vę né mela kam, pa je trgófco rękla kaj oče kupiti:
“- Čé je tak te … čujte imate albuma ili cedeja od najpopolarniših popévki od “Leta 3?”
Trgóvec je napamet znal ze šteraj – naslovaj od tote grupe respolâže, pa ji je, dok je f stiski čakala na srdini štacuna, glasno referéral:
“- Čujte gospođa, jiv cede “Mama šč” nemamo jer je momentalno resprodani! – Ali vam morem ponuditi druge jive najpopolarniše popéfke, kak so: “Angela Merkel se..”, “Živi ku…”, “Žive pi…”, “Pr… majko”, Ku…. do Vjere”, “Ku… Marko”,”Ku… u čelo” …”
Čim je Sida čula prvih pâr trgofcovih réči, žereče se je resrdila i zakričala na jęga:
“- Čujte, gospon trgóvec, najte tak bezobrazno kričati i zgovârjati takše odurne prostote!?”
Trgóvec ji je od pulta znova lubezno dopovedâval:
“- Gospođa – kaj smo se né razmeli? – Pitali ste me za naslove najpopolarniši popéfki Leta 3! – To kaj sam vam povédal so vam naslovi jivi najpopolarniši popéfki! – Zbęrite si štero očete!?”
Čim je Sida skapérala kak se zovejo najpopolarniše Letove popéfke štere oče kupiti, zavrtelo se ji je v malomo mozgo, obrnola je z očm’i na bélo, kolęna so ji cocnola i s čęlom je flâpila derektno po štacujskomo taraco!
Pred dvé vure so jo z Hitne dopęlali dimo. Dojšle so jo glet žénske, Đurini dedi i Zdénka.
Odma po tém se k jim dopęlal i on trgóvec z knižare dé je kupuvala cedeje, zaskrbleni za zdrâvje svoje mušterije, ka vidi kak je i – na dâr ji je donęsel Letovo kazeto “Pr… majko”!
Sida je znova opâla v nesvest.
