F pondélek pred Sim Svecima Sida je rękla Đuri.
“- Znâš kaj … jâ sam f srédo bila na cintoro célo dopólne. Ophodila sam sę naše grobe i sę grobe od rodbine. Posad’ila sam mačohe, vu vaze naljâla vodo i déla krizanténe. Vužgâla sam lampaše na sakomo grobo kę sam ophodila. Čuj Đura, ti bi mogel dénes oditi i na grobe déti lampaše, jer toti kę sam déla, flętno dogor’ijo. Idi, ka bo za Sę Svece lépo zgledalo, ka naši grobi nado naj bole zap’uščeni, kak da smo najv’ekši srmâki i nemarjâki!”
Đura je nevóno rękel: “- No, dobro. Pem. – Naj ti bó!”
Naložila mo je ovak:
“- Najpredi jęnoga lampaša déni na grob moji jape i mame, a te na grobo tvoji, jape i mame. Te pa na grobo strahoninski dedeka i mamice i na grobo črečinski mamice i dedeka. A te pa na grobe dedeka i mamice po tvoji stráni, onih z Puščin i Dujkoski. Te pa na grobo vujča Vanča i vujnice Ilke, pa teteca Štéfa i tęce Rozine. Te pa .. na grobo strica Tonča z Slakofca i strinike Kate. Onda déni lampaše na grobe mojih vujča i vujnike Vrtariči z Pretetinca. Na grobo strica Rafija z Križopotja i strine Bare z Varad’ina déni dvâ lampaše, jer so stric Rafo męne póseb meli radi. Te pa išče déni na grob tęce Krstine z Cpódjega Kuršanca i teteca Blâža z Šlibarovca. I onda sam išče, ako očeš na grob Kovâčovoga Markeca ki je mlâdi hmrl i to vénder od pij’ače, ali je bil jâko dober čovek! Déla sam ti v dvâ cekare petnájst lampašov, tak ka bo ti zasigurno dosta!”
Išče mo je rękla: “- Naj si sobom jęmati péneze, ka ne potępeš! Tam ti ne nucajo! Dobro?!”
Đura se naob’edoval i dišel. Hodil je dugooo. Dimo je došel f pól noči. Zmóčeni.
Sida ga je pitala čé je sę zbavil kak mo je rękla i dé je bil tak dugo. Rękel je da je na cintoro pazil, jer je čul ka balafci krâdejo lampaše.
F tork je Sida po ráni meši išla na cintor glet … ali, na jivaj grobaj – nigder néti jęnoga lampaša. Dojšla je dimo i to je srd’ita povédala Đuri.
Đura ji vel’i: “- Znâš kaj, krâââdejo! Krâdejo balafci lampaše, pa jih preprodâvlejo. Tre iti f srédo, pred Sima Svecima navęčer i te bodo seg’urno lampaši ost’ali na grobaj!”
Tak je i bilo. F srédo je Sida Đuri nal’ožila petnájst lampaši i poslala ga je odvečer na cintor. Đura je hodil dugo i v noči dojšel dimo.
Sida ga je pitala dé je tak dugo bil! – On ji je rękel da je na cintoro pazil, ka balafci naj pokr’ali lampaša, jer se na gróbijma fést krâde!
Sida je na sę Svece, po ráni meši išla na cintor. – Nigder néti jęnoga lampaša!
Đuri je povédala! “- Pa kaaaj ti misliš!”
Đura ji je rękel: “- Sam ti rękel da krâdejo! Nikaj. Bomo si sobom dénes zeli i deli na grobe!”
Kóli pólneva, dok je Đura vršejaril neka po štali, na Sidina vrâta pozvon’i krčmar’ica Kata i pita Sido: “- Sidika, dober dan, čuj imaš morti vęč onakši lampaši z Mađarske kakše mi je ove dneve prodal tvoj Đura – po osem kuni, a ka takši v zadrogi koštajo dvnájst? – Tote ka mi je tvoj Đurek prodal, sam odma prepr’odala po dęset kuni. Čé imaš vęč toga … jęna moja mušt’erija treba išče – petnájst komâdi!”
(Jęn)
