Sida je naskriž z zętom Ivijom. On se nekaj na jó napuhâvle, jer je Sida negder nekaj pręveč povedala za jęga, pa so z Zdénkom i vnukaj k jim né dojšli več dvâ tjędne. Dénes, na Lucijino običaji nalâžejo ka se pęče koščična kelešica. Sida je telefonérala Zdénki:

“- Zdééénka, čuuuj, dénes je Sveta Lucija pa sam kak navék, spękla koščično kelešico. Biročko koščic sam nutri potępla i skorom deci koščičnoga ólja! Tak deš’i ka bo vam se, čim dójdete, scéjalo z zób! – Dójdite z decom! – Vróča i dišeča kelešica vas čâka!”

Ivo je čvrsto odlučil – ka se nejde! Sedel je pred televizorom i z rókom dâval signâle Zdénki naj jo otkanta! – Zdénka se onda pred Sidom počela zvlâčiti, da némajo časa, da je zima, da…

“- Baka, znâš da je vę takše vréme ka se ne hodi nekod po hižâj… Toti korona viros omikron… znâš, malo je preopasno! – Naša deca ti sęposód lindrajo… pa ka vam naj nekaj donęsli…!?”

Sida ji je odpopévala:

“- Zdééénkica, bez brige! – Opče se naj giftati! – I jâ i mój stâri smo ti cépleni! – Tri pót! – I bedvâ imamo potvrde! – A i za vas znám da imate potvrde da ste se cépili! – Ali męne to né brige! – Nam nišči nikaj nębre! – Samo dójdite! – Bez brige!”

Zdénka se zvlâčila, a Ivo ji je kâzal naj punico odrine kak znâ! Zdénka ji ovak govorila:

“- Ah mama, znâš da bi jâ išla, ali … razmiš… ka naj nešči nam pustil kakšoga virosa… ka naj nešči deco zarazil!? – Znâš, tu deca, a … toti omikron ide róm najbole na mlâde!”

Sida ji je i toti pót nazâj otpopévala:

“- Zdééénkica, bez brige. Jâ i stâri ti nikod ne hodimo! Tjęden dni smo ne opče bili vun z hiže! Sam smo dóma! I nišči živ k nam ne hodi! Némamo se dé zaraziti! – Bez brige bodi! A kak sam rękla, obedvâ imamo potvrde! – Dójdite! – Več sam tri tjędne né vidla vnuke!”

Ivo je pâk Zdénki z kaoča mâhal da – on nejde, da naj jo odžâga! – Zdénka je Sidi govorila:

“- Čuj, mama nęęęznam… Znâš, jâ sam ti né róm fést zahâčena za – koščično kelešico… A i deca… Neznam čé bi ti šteri opče kóštal… Jer znâš da so fačoki špuravi, nečejo jesti néti napolitanke, néti čipsa, a … nęęęznam či bi ti šteri kóštal tote – tikvine koščice, to kelešico!?”

Sida ji je otpopévala nazâj:

“- Zdééénka, pa valda znâš ka te naj zvâla sam na kelešico?! – To se dénes na Lucijino sam tak od negda pęče na râdeš! – Ęm znâš da jâ navék neka porinem f kâhlo! I vę sam – ono kaj vi najrâjši imate! Kaj ti móram sę povédati? – Kokota sam zaklâla! – Več se pęče! – Črléni je kak čréšja! – Čuješ črez telefón kak deš’i!? – Dójdite! – Flętno! – Čâkamo vas!”

Zęt Ivo je dale mâhal Zdénki – naj se je réši kak znâ, da on nav išel na Glavatišče! Zdénka se dale sukala, a onda pa je počela mamo spitâvati:

“- Kak veliš, mama … kokota?! – Čuj … a reči mi, ima toti tvoj kokot potvrdo?!”

“- ?!”

“- Mama, pa znâš ka po Međimorjo, skupa z korona virosom ponorévle i viros ftičje gripe, šteri napâda pernato živâd, pa je jâko važno ka toti tvój kokot slučajno naj bil zaraženi zótim virosom… pa te zâto pitam čé … toti tvój kokot ima – potvrdo ka je né mel ftičjo gripo?”

“- ?!”

Povratak na naslovnicu…