Naša pajdaš’ija se več na Nóvo leto dogovoârjala, kak bodo preslavili Vincekovo. Đura je rekel, da naj oni kupijo jestvino, a on da bo dâl vino. Oni so Đuri póseb zapov’edali:
“- Đura, može, mi dámo jestvino i to fino jestvino, bunceke, carsko, krmenatline i orehove bâpke i prhkače, aaali, očemo ono tvojo vino v gor’icaj, a né ovoga tvojega z brâjdi tudoma!”
A on jim je nazâj zapopéval:
“- Čujte, jâ si mislim ka bi nam bilo bole ka se naj z aotaj pęlali v gorice, a onda v noči, f šuso, po škliskim, z aotaj dimo, a zima, a milicija? Inače ovo moje vino z brâji je prvi klas!”
Ovi si zakričali kak na demonstracijaj:
“- Né! – Néti govora! – Namo valda na Vincekovo pili hekija! Tó je za noge prati!”
” – Dooobro! – Tak bó kak očete! Vinceko bo prę meni v gor’icaj, jęmalo bo se z lagva, tam bo se slavilo kak to zapovédajo vinske regole. Vi krę jestvine, samo išče kupite kiselo vodo!”
Sę je bilo dogovoreno.
Po Trima Krâlima so Đura i Sida išli v gor’ice – malo glet. Da so išli f podrom Sida je rajkala po lagvo, a onda i s šibom merila v lagvo, pa Đuri povéda:
“- Đura, pa v lagvo ga sęga… morti… néti… kakših… dvajsti litri! – Nési smel tulko resprodati! – A vel’iš, ka si sósedo i za Vincekovo obęčal prodati – išče dęset litri!? – Tó nav dobro! To kaj imamo je né dosta za tote naše domâče goste, na Vincekovo! – Meli bomo dvajsti ludi!?”
Đura je takâj šacal, meril, premišlâval si i rękel Sidi:
“- Tiho bodi, kaj te brige, sę bo vredo!”
Sledeči dén se je od jutra, Đura sám spravil v gor’ice i zę sobom je pęlal f kanistraj pędeset litri vode. Sida ga je pitala, kam to pęla, i zakaj tulše vode?! Đura ji je rękel:
“- Idem v gor’ice. Treba je poč’istiti i oprati, jer je zmâzano kak f koco!”
Sida ga je zbočki poględnola pa se mo je zagr’ozila:
“- Dobro. Sam pazi ka naš neka motal zótim vinom – ka je ost’alo!?”
Đura ji je zmâhnol i rękel:
“- Tiho bodi, kaj te brige, sę bo vredo!”
V nedelo, dén pred Vincekovim, po lépomo sunčanomo vremeno, so se z aotaj dopęlali v Đurino klét v gor’ice. Dojšlo ga jih osemnájst.
Na stol so deli kuhane bónceke, rebra i krmenatline, orehove bâpke i bidre i drugo suhâlje, kaj so ovi donęsli. Žénske so predložile, i s’i so se složili – ka se najpredi dobro naj’éjo, a onda bo se pilo, onda bodo išli vum vesit kolbâse i špeke po čokotaj i – sę drugo kaj propiš’uvlejo vinski štatuti! I dobro je ka se prvo najéjo, ka bodo meli podlogo i ka jih pręflętno naj prij’elo!
Da so se dobro najeli i da je vudrila opča žeja, Đura i Pepi so išli f podrom po vino, a žénskaj so rękli naj po čokotaj navesijo kolbâse i falate špeka, ki so ost’ali, kak je to red!
Da so Đura i Pepi dojšli f podrom i šteli pust’iti vino… – Nę tęče!? – Z lagva nę tęče vum néti kapla! – Zvâli so ove druge! – S’i so se zagn’ali f podrom!
Otp’iraju pilko… Zaprejo! Otprejo! – Treskajo … Nikaj! Próbajo rajkati… – Néje prâzen!
Onda so Imbrek dojšli kcój. Nalukâvlejo! Ozgór por’inejo šibo v lagev! Vęl’ijo Đuri:
“- Drâgi Đurek, tębi je vino v lagvo zmrzlo! – V lagvo ti je led! Lagev ti je i malo počil, tu cpód, jer cpót curka! – A, â vidim i ka imaš obločeka otprtoga na oberlift! – Nešči je pozâbil zaprti… Zmrzlo ti je!
Te so i drugi povédali:
“- Pa kaj ti misliš!? – Pa naša vina bez brige zdržijo do minos osem, pa i dęset! – A óna flašérana – i do minos petnájst! Neštera i do minos osemnájst! – Makar je ostâvleni otprt obloček, ipak do minos deset je móralo zdržti”
Đura se je bránil:
” – Dečki, pa štó bi si bil mislil ka bo tak stisnolo – ka bo počilo? – Moje vino bi sikak zdržalo minos dęset! Ali tu v bregaj je navék mrzliše i tu je valda bilo i minos petnájst…”
Đura si je globoko zdehnol i zaklučil:
“- Je, vę, kaj je – tu je! – Nikaj! – Nębremo si pomoči! Vę nam pręostâja jed’ino to ka idemo dimo, i ka se počastimo prę męni z mojim brajdâšom… pa bómo tam po brâjdaj ob’esili kolbâse i tó…”
Tak so se ludi, s’i, žejni, trézni i srd’iti, z aotaj pęlali na Glavatišče – k Đuri!
Da so se pęlali prti dimo, čim so se sęli v aoto, Sida je Đuri namétala:
“- Kaj si tó napravil? – Kaj si – i ono malo vina kaj je ost’alo v lagvo, prodal?! – I kaj si te, tak puno vode naléjal v lagev… ka je zmrzlo? – Imaš ti pamet?”
Đura jo je zašlignol i rękel naj ftihne:
“- Tiho bodi. Kaj te brige. Sę bo vredo! – Vrâg po téh pâr litri vina!!”
