Pepijov Francek bi letos trebal završiti sedmoga razreda. Pepi mo je célo leto povédal:
“- Francek, vuči se! – Čé prejdeš sedmoga razreda jâ bom te častil z – sto evri!”
Predzâdji dén škóle je Francek dojšel z škóle i veli japi Pepijo:
“- Japa, završil sam sedmoga! – Vę dej kaj si obęčal!”
“- Očem videti na pismeno ka si pręjšel.”
“- Dobro, zutra bom ti donęsel na pismeno! – A ti prepravi – ono kaj si obęčal!”
Drugi dén Francek je dojšel z škóle i več od pótnih vrât mâhal japi Pepijo z nekšim papérom!
“- Kaj je to?”
“- Pofalnica!”
“- Dęj ka vidim!?”
“- Prvo dęj péneze – kaj si mi obęčal, onda boš gledal…!”
“- Na péneze! – Vę dej ka vidim!”
“- Na, gledi si!”
Pepi je gledal… gledal… pa ga pita:
“- To je pofalnica! – Nekša je bóga… slabo napisana… – A dé ti je svedođba?”
“- Svedođbi ga ga né! – Dob’ili bomo jih na krajo fęrja! – Néso ftegnoli napisati!”
Pepi je totoga papéra črno gledal… te je zvâl Lizo… te so obedvâ gledali…onda Pepi zmónda:
“- A zakaj ga na toti – pofalnici né štambile… zapraf… vidi se nekaj… čâkaj… jęje nekša… kaj to piše… “Socijalistički savez radnog naroda Glavatišče”…!? – Kaj je ve tó? – To je né od škóle!? – Čuj Franc, ti si tó… to si ti falsificiral!?- Što ti je napravil to? – Što je falcificéral?”
“- Nam povedal!”
“- Poveč, drugač bom zvâl ove z kotarskoga véča za sozbijanje kriminaliteta mlâdih!”
“- Nam povedal!”
“- Poveč, drugač bom zvâl ove z Saborskoga odbora za zaštito od delikvencije i kriminala!”
“- Nam povedal!”
“- Poveč, drugač idem f plót i vrezal bom leskovo boto debelo kak pâlec, pa boš videl ti…!”
“- Dobro, bóm povedal! – Ali to ka bom priznal, tak ka boš znal ka je to iznuđeno prisilno i z tvojim agresivnim nagrâžajom! – Toto pofalnico mi je napravil sósedov Jožek!”
Pepi i Liza so prijeli Franceka za rokâv i za golér i pęlali ga k sósedo!
Đura je bil na dvoro. Pepi mo je od vrât kričal kakšoga so kriminala stvârjali Jožek i Francek! Đura je odma zvâl Jožeka! – Jožek je odma dobejžal! – Đura je strogo zazijal na jęga:
“- Joška, vel’i sósed Pepi ka si jivomo Franceko falcificéral škólsko pofalnico!? – Je to istina? – Dé si zel toto pofalnico i komo si fkral štambilo!”
Jožek se sfrkal kak skupnih šest banki i rękel:
“- Nam povedal!”
“- Poveč, drugač bom zmesta išel na kotarski centar za preodgoj i prejavil te udbi!”
“- Nam povedal!”
“- Poveč, inače bom te z milicijom dâl otpęlati i zaprti f popravni dóm!”
“- Nam povedal!”
“- Poveč, drugač bom išel f plót i vrezal leskovo boto i tak te nažvagal ka boš tulil!”
Čim se mo je deda nagâžal z leskovom botinom, Jožek se zdigel i vupral dedijo:
“- Kaaaj? – Ti se męni nagrâžaš z botinom?! – Ti męni prétiš z fizičkom silom? – Dobro! – Dé mi je telefon?! – Vę bom jâ zvâl Centra za zaštito mlâdih od nasilja v obiteli, jer se mi agresivno préti, jer se mi nagrâža s fizičkom silom opasnom za moje zdrâvje i život…! Čâkaj, znám ja broja napamet… pa bomo vidli… ęli mi se smé nagrâžati i ugrâžati života…”
Deda Đura je Jožeka prijal za róko pa mo, bole męfko veli:
“- Jožek… néje to róm tak bilo… i ne mislim to ja tak… kak si si ti pretomâčil…”
Te se v réč porinol i sósedov Francek:
“- Je, sósed, jęste se mo nagrâžali z fizičkom silom… jâ sam čul… točno kak i męni mój jepa!”
Đura je miril sitoacijo:
” – Né Francek! – Pa znâš ka jâ Jožeko to nębi… ka né Jožek…? – To jâ sam tak…!”
I Pepi i Liza so se zvlâčili s toga:
“- Néje to bilo róm tak… ka bi se izički nagrâžalo nekomo… To mi sam tak… od negda…”
Jožek se dale fpiral:
“- Né deda! – Né sóseda! – Jęste! – Nagrâžali ste se! – Prétili ste… sprâvlali nasilje, agresijo…”
Deda Đura je brénzal Jožeka:
“- Néje to bilo róm tak… Pusti Jožek… Čuj, vmirite se obedvâ! – Nate, tu vam je pedesętka, ite nekam na jęden fujburger ka se vmirite! – Naj bó kaj je bilo – bilo je! – Pustimo vę to na miro! … I ti Pepi…? – Koga vrâga hodite k nam za nekaj kaj je nikaj…?!”
