Kak so se respisali izbori, na Udrogi penzijonéri Glavatišče da gut se rezveže žereča politička resprava. Pred dvâ tjędne so se takâj zahačili za politiko. Jęni so fâlili Plenkoviča, drugi Bernardiča, tretji Demokrščane, štrti Hrâsta, peti Mosta, a največ jih je hujalo jęne i druge.

Đura i Fęri so se zgrabili tak grdo, ka so jih žęne mórale jęmati širom i miriti.

Onda je Đura žereče odbrusil Fęrijo i sima “krivovernima” v Udrogi dâl do znanja:

“- Gospoda, članovi Udroge, za drugo nedelo organizéramo izlet v Blajborg. Čé bo puno ludi, pęlali bomo se z aotobusom, a čé bo nas malo, pęlali bomo se z svojaj aotaj, a Udroga bo platila benzina. I tam s’i ki pejo, dobijo osvežâvajočo pijačo, kolko što oče. Jâ zapišuvlem kandidate, męni se javite! – I né me brige kaj bo štó rękel, pa makar bo v Udrogi i – raskol!”

Onda mo je Fęri povrnol z istom merom:

“- Drugovi, jâ kak potprecednik Udroge, drugo nedelo organizéram izlet v – Jasenovec! – Išlo bo se z aotobusom. – Čé bo veliki interes pemo z dvâ aotobuse, a čé ga nav dosta kandidati za aotobus, onda saki pe ze svojim aotom, a Udroga bo platila benzina i amortizacijo. I saki šteri pe dobil bo jestvino kakšo si sám zabęre, ili kolbâse, ili krmenatlina! – Ako dójde do raskola v Udrogi, dojšlo bo do raskoga! – Né me brige!”

Da so dojšli dimo ze sastanka, Sida je napâla Đurija – zakaj je to tak napravil:

“- Đura ti bi kak precednik Udroge móral biti neotralen, a né ka se tak svâdiš za politiko – ka si sposvadil célo Udrogo i napravil raskola!? – I tak ka znâš, jâ ti nejdem vuti Blajborg čé boš me i z botinom tiral! Naj ti ide što oče, ali męne naj nagovârjati! Kulko sam jâ preštimala i Fęrijova Ilka je grdo gledala Fęrija, i on bo mel “pésjega sprevoda” dóma – za toti izlet f Jasenovec. Zapraf, kaj me brige!”

Dojšla je druga nedela, a Đuri se je né javil néti jęden kandidat za Blajborg. Sida mo je rękla:

“- Kaj sam ti rękla?! – Kaj sam ti rękla!? – Samo si si napravil svâjo! – Néti prijatel Pepi ti neče iti! – Taaak! – Vidiš kaj si napravil?! – samo si napravil raskola! Ti je to trebalo?!”

Đura je bil nervozen. Hodil je gori doli po hiži i móndal. Te se obrnol prti Sidi:

“- Vę, kaj je – tu je! – Nišči se mi je né javil, ali niti nišči nęzna ka se mi je nišči né javil! – Čuj Sida, nekam moramo oditi! – V jutro bomo se otpravli i nekam idemo! – Tak-i-tak nišči nęzna kulko nas je, smo sam mi dvâ ili nas dvajsti – tridęsti! Zutra v jutro idemo – nekam!”

V jutro so se sęli v aoto. Đura je pital Sido – kam! – Ona je rękla “- Pravac Marija Bistrica!”

Đura je brnol na Bistrico. Bilo je lépo vréme, vuni je bila meša. Zbavili so sę po redo kak je Sida komandérala. Nazâdje so se sęli za stol kre štandi, dé so se pękli krmenatlini i kolbâsi. Bila je fést stiska, ali fčakali so se konobara. Đura je naručil za Sido krmenatlina, a za sębe pâr kolbâsi. Naj’eli so se i pomalem pili pive…

A onda se do jivoga stola došpancérajo – Pepi i Liza! – Đura se iznenadil:

“- Peeepi, Liiiza! – Pa kaj vi tu délate! – Saka čast! – Drago mi je ka smo se najšli! Sędite se!”

Pepi i Liza so se sęli k Đurinomo stolo. Đura je po šęgi pital Pepija i Lizo – zóčim jih more ponuditi i odma se okóli ogledaval dé bo zględal konobara. Pepi mo je rękel:

“- Đurek, dojšli smo sam na osvežâvajočo pijačo – kak je obęčano na sastanko Udroge – za sakoga šteri pójde v nedelo s tobom na izlet! – Zovi nam osvežavajočo pijačo!”

Đura se slatko nasméjal. – Klimal je da je točno tak bilo na sastanko, ali ga je pital:

“- Točno, točno! Ali Pepi, ręčite čé bi si predi mogóče kaj pojęli, ka vam naručim?!”

Pepi mo je rękel:

“- Nééé Đurek! – Né treba! – Fâla! – Naj’eli smo se kolbâsi pre Fęrijo, štere je on na sastanko obęčal kak potprecednik Udroge. – Fęri i Ilka sedijo tu – štiri stole dale! – Zględni se!”

Povratak na naslovnicu…