Pred Sima Svecima so pre Pepijo i Lizi sedeli nan tračpartiji Đura i Sida. Spominali se o sęmo.
– Sida je rękla: “- Čim smo stareši, sę vęč ga grobi štere moramo ophâjati. Samo v Nedeliščo, mi bi trebali pohoditi na štrnájst grobi. A na Hrâščinskim grobjo je grob od dedeka i mamice i vujča Vanča … pa na Macinskim od teteca Franceka z Trnofca…!? – Nigdâr sam to né mogla v jęnim dnevo ophoditi … jer sigder moraš malo postâti … vužgati lampaša i neka zmoliti za jive duše …!?
Da – of mój Đura, čim je nekši svetek ili lépši dén, on je navék mel sastanka ze svojim Ribičkim društvom, jęmpot f Trnovco, pâk f Hrâščano! Tak i navék na Sę Svece! – Navék sam mórala sâ gróbja i grobe ophâjati sáma, a on – na ribičkomo sastanko! – Nóóó, vę te itak, láni za prvi maj je – ostavil Ribičko društvo, spisal se vun i več vénder ne hodi!”
Liza je takâj nabrojila dęset grobi v Nędeliščo na štere mora iti, a i ona mora iti na Hâščinsko, na grob kuma Vinca! Takâj nęzna kak sę tote grobe v jęnim dnevo ophoditi!
Sida je onda zrękla ovak: “- Ve, da je konačno jęmpot moj Đura fraj od totoga Ribičkoga društva, vę moremo napraviti tak – ka jâ i Liza idemo na gróbje v Nędelišće i ka na sę naše grobe vužgemo svéče i zmolimo. – A vi dvâ, Đura i Pepi, vi bote išli na grobje f Hrâščan i v Macinec i na grobaj od naše i jive rodbine vužgete svéče i neka zmolite, tak ka bode na sim – jivaj i našaj grobaj nešči domâči, ka bo se to znalo, jer – dober glâs se dalko čuje! – Može?” “- Može!”
Tak je i bilo. Na Sę Svece so se po obedo otpravili, žénske na Nędelsko gróbje z vrečom lampaši, svéčaj i s cvétjom! Đura i Pepi so v aoto namętali kup lampaši i odišli na grobja: na ono f Hrâščano i na Macinsko. Đura je pajdóč f Hrâščano kupil i jęden pušel živoga cvétja!
Zvečera so i jęni i drugi dojšli dimo. Đura je bil malo pijan, a Pepi né, ali néma veze -na Sę svece se malo – dušice zapâjajo! Obavili so sę ono – kaj so se dospoménoli.
Na Dušni Dén je štacun delal do pólneva, pa je Sida po meši, išla v zadrogo ka kupi friškoga kruha. Pred zadrogom se zišla s hajdi žénski, svoji pajdašici. Dugo so se spominale.
Sida se onda pred sim žénskama pofâlila kak je jén Đura za Sę Svece bil i f Hrâščano na gróbjo, dé so zakopani jéni mamica i dedek i vujč Vanč i tam je del svečjake i molil, ka bo se vidlo ka oni poštuvlejo rodbino, jer – dober glâs se dalko čuje!!”
Jędna Sidina pajdašica, štero Sida pozna samo ovak – z viđéja … valda so skup hodile f škólo, a z Fidrijaka je odma, pred sima je pitala Sido: “- Čuj Sidika, a kaj je vam bila jędna žénska, ka je zakopana na Hrâščinskim gróbjo? – Mislim ka joj na spomeniko pólek slike piše Novâk Milena, takša lééépa, béla, lepošnâta žénskica, fajna kak precednikovica Kolinda, ka je láni – za prvi maj znenâda hmrla i f Hrâščani je vę zakopana… A bila je stara 47 lét da je hmrla, piše na spomeniko! Ze spomenika se vidi i ka ji je móž hmrl več pred dvajstipet lét! – Znâš Sidika, vidla sam ka je tvoj Đura na toti grob donęsel veliki pušel živoga cvétja i vužgal velikoga béloga lampaša, a onda se je bęčal tak kak déšč, tak ka so mo suze curele po kameno … Pepi ga je tešil i brisal mo je suze i kóma ga je spravil kręj od groba … se mi vidi f krčmo, ka dójde k sęj!?”
Sida se zbunila … široko jo je poględnola: ” Kak veliš? – Milena? – Lepošnâta …? – Nééé! – Imamo sam dedeka, mamico, vujča .. i Đura je tam mel Ribičko društvo … ali je láni za prvi maj … – Kaj ti veliš … láni za prvi maj … Đura je cvétje … bečal se kak déšč …?!?
Sida se v momęnto obrnola, zajahala biciklina i – tirala prti dómo!
