Poštar zazvon’i. Pepi opre. Preporučeno. “- Potpišite na crti!” … Opre kovęrta. Čita:
” Opčinski sód Čakovec. Pozivate se dne. 29. veljače 2018. godine, u svojstvu svedoka, u predmetu tužbe, tužitela Đure Horvata iz Nędelišča, Glavatišče 52, protiv tuženika Dragutina Kovačiča iz Nedelišča, Glavatišče 49, radi prekršaja iz čl. 497. st. 3., 7. i 11-a i 11-b, t. 1., 2. i 6. i čl. 481. st. 5., 11. i 17. t. 3., 5-b., 11. i 17-c., podtočka 4-a i 7. u svezi s čl. 267. st. 1. i 5., t. 27 i 31-a i čl. 314. st. 6. t. 12., 14. i 21. i st. 22. i 23. t. 2., 5., 11. i 14. te čl. 331. st. 7. t. 3. i 6-c. i st. 9. t. 3-a, 5., 11-a i 19-b i 14-a PZ-a (NN 21/87, 11/91, 14/91, 22/96, 14/99, 9/00, 22/00, 47/05, 51/06, 33/11, 9/12, 41/16, 43/16, 45/16, 48/16 i 37/17).
– … ?!
Pepi zaz’ove Đuro naj mo pové – kaj je to!?
“- Pa kaj nęęęznaš?! Pa ono, ka me je po Sim svecima Dragijov pes vgrizel i ręzdral mi je nóve hlače i duge gače prék! Mel sam matrjalnoga kvâra, trpel sam smrtnoga strâha i tjęden dni trpel sędem inekciji v bol’ečo rit, jer mo je pes né bil cépleni! Imam i vizipęrta od Haloge! Kaj se ne zmisliš? Pa tvoja Liza je rękla da si ti – sę videl! … I lépo sam ga opoménol – onda da smo se na Mik’ulovo, črez pól noči štricali f krčmi “Kata – rajska vrâta”, i moja Sida je jęgovi Juli zijala prék póta črez oblok … i pisal sam mo pismo – opomeno pred sód, naj plat’i otšteto pecto kuni – ka bomo si dale zdobra! I znâš kaj mi je rękel nazâj?! – Rękel mi je da sam tote radničke hlače v Gekajo opče né platil, pa ga ga né kvâra, da me inekcije nika ne koštajo jer plâča socijalno, a ako ne dobim besnóčo – da ga onda nîti nav kvâra! A ako pa durnem – da onda otšteto tak-i-tak nam mogel hasn’uvati, pa me nîti ne prîpâda!
– …?!
Pepi onda zaz’ove i Dragija – ka čuje i od jęga, kaj je to bilo! Drago mo vel’i: “- Aaah, Pepi, znâš ti Đuro! Na Dušni dén je bil f krčmi od polneva do večer’i. I te da je išel dimo, lovil se je po vulici – za grâje! Mój Bandi mo je nika né napr’avil, makar ga je of črez grâjo vréđal, onda ga je išče črez grâjo … ka ti nam povédal kaj …! A hlače i ritesnico si je ręzdral na droto – te da se je vlekel kre grâje! – Kaj se ne zmisliš ka smo se na Mik’ulovo za to svadili tijam do pól noči f krčmi “Kata – rajska vrâta”? – Samo ti Pepi idi jęmo za svedoka! Ali, ka znâš – jâ sam si isto najšel sved’oka! Rękel sam na sódo naj pozovejo za mojega svedoka krčmarico Kato, ka ona pové – kakši je bil Đura toga dneva – da ga je tob’ože vgrizel Bandi, a sę drugo se onda razmi sámo po sębi!”
Dojšli so na sód. Si tri. Sótkija prez’ove: “- Svedok Mlâčjak Pepi.” Stal se je. “- Jâ sam!”
Sótkija pita: “- Kaj vi znâte o tomo štetnomo događajo, o peso, o alkoholizérajo i o svâji između okrivlenoga Dragotina i oštečenika Đure?”
Pepi ji vel’i: “- Gospođa sódec, znâte kaj … mi s’i tri smo si sósedi i dâlka rodbina i s’i po prék križovâti kumi … i jâ se vę naj štel zam’eriti néti Đuri, néti Sidi, néti Dragijo, néti jęgovi Juli, néti pa Dragijovomo peso, jer nigdâr nęznaš … a moja Liza mi je zapov’edala da – čé kaj gusnem ka nešteromo nav praf, te bole ka dimo … “Sótkija je odma – zast’avila Pepija i rękla – ovoj, naj zap’iše: “Svedok je neverodojstojan i nepouzdani”! I Pepi si je globoko zdehnol, drâge vóle ftihnol i blâženo se sel.
Te je sótkija rękla, naj poz’ovejo nutri sved’okijo Šmarjak Kato, mésno krčmar’ico.
Kata je nutri dokorâčala mošk’atno i gizdavo, kak da sotkijo ide pitat “Kaj bóte pili”!!
Sótkija jo je pitala: “- Katarina Šmarjak, kaj vi znâte za jihovo pijânstvo, za jivo svâjo, za pesa od Dragotina Kovačiča i za škodo štero je pretrpel Đuro Horvat?”
Kata ji je rękla ovak!
“- Sęęę!!! – Jâââ znám sę! – I jâ sam sę to – več réšila!
– Prvo i prvo, toti moškârci so né nikši pijânci i svadl’ifci, nęgo poštena i fina gospóda! Jer v mojo gostijonico hodijo samo fina gospoda! Tak ka bote znali.
– Drugo i drugo, Dragijov pes je jęden dober i mili kujsek, šteri lude ima rad i męni hajdi pót pomâže, jer da mi po pól noči pijânci nečejo iti vum z gostijonice, te prosim gospona Dragija naj ide dimo i naj ga dopęla f krčmo, ka mi pom’ore, tote – spraviti vum!
– Tretje i tretje, opče ste nas né mórali sém zvati, jer jâ sam totoga sóda – več réšila! Toti gospóni so bili pre męni f krčmi, na Mikulovo navęčer i o totomo peso i kvâro smo vodili respravo šest vur! Te sam jâ, kóli pol tretje vure v jutro, toto respravo završ’ila, i tó – z nâgodbom!! – Rękla sam jim ovak: “- Doostaa! Ti Drago vę plâti toti pet litri kę ste spili, za mir pre hiži! Ti Đura naš nika platil, ka si nam’iriš kvâra od Dušnoga dneva! A ti Pepi boš v óvim predmeto pręjšel mukte, jer – “kaj si videl – nési videl”! Jasnoo?! Čé se slâžete zótim, te vę jâ išče častim z jęnim litrom! Dobro?!” – I gospođa sódec, s’i so se zótim složili, a Drago i Đura so se nazâdje i skuš’uvali! Ali … znâte, dečki su bili več strašno trudni, tak ka je jęden od jih – na stolo zaspal, pa se morti róm sęga toga ne zmisli! Aaali, lęfko vam pres’egnem da se je na mojo rešéje néti jęden né žalil! Pitajte jih bâr- čé je né bilo tak!?”
(Jâ)
