Udroga penzjonéri Glavatišče naručila je za svoje člane mandarine od jęnoga proizvođâča šteri, kak je na oglaso napisal, živ’i pólek Neretve. Po dugim pogâjajima, Đura je dogovoril ka čovek of pondélek dopęla mandaine.
Dopęlal je punoga kombija. Bile so – kak za Udrogo penzijonéri fal, sęga – sędem kuni za kilo. Penzijonéri so stâli v dugi red, a čovek je prodâval. S’i so nosili, ki vu vréčkaj, ki f cekaraj. Juli i Ilki so se ftrgle ruče na vréčkaj, pa je Drago móral dojti pred jih s tâčkaj. Pepi je kupil petnájst kil i takâj si jih je dimo pęlel f tâčkaj.
Sida je zamudila, pa so si ona i Đura stali v red med zâdjaj. A nazâdje, za jih i za išče neštere penzijonére, mandarine so sfal’ile! Sida se resrdila:
“- Đura, idi ti spât! – Kaj si né rezervéral, ka je róm za nas sfal’ilo! Mogel si si prębrati najlepše i najbolše! – Vrâbec te dâl! – Ti si precednik kak z repe bat!”
Predi nego je Đura kaj rękel, f štric se je porinol toti gospon z Neretve, pa veli Lizi i Đuri:
“- Ne brinite šjora, ne brinite šjor! I meni je ža, ća je baš za vas presedniče Udroge nestalo! Ali, ja se sada vraćan doma, šutra ponovno naberen mandarine pa ću prekošutra prvo navratit ovamo i vama koji danas niste kupili, prodati kolko god želite, isto take, friške mandariiine!”
Đura, pa i drugi šteri su ne dobili, so móm bili zadovolni i rękli: ” – Mooože, važi!”
Sida i Đura so išli dimo bez mandarini. Pepi jih je pozval k sębi. Te jim je ponudil ka kóštajo tote mandarine. Dok je prebiral po mandarinaj, Pepi je komentéral:
“- Vidiš, nešterne so malo … kak natučene … nešterne so malo … męfke … jęne so malo robave… Ali znâš … dugi je pót … pa se to drnda … pa se malo gjęte … Čuj … néso pręveč slatke… Tu i tam nešterna ima fleka… ali pót, tijam odnot pa – do sém, do Glavatišča…!?”
F tork je Đura zval – šjora od Neretve, šteri bo jim zutra dopęlal mandarine, pa mo veli:
“- Halooo, šjor! – Ęli bęrete mandarine ka bote zutra dopęlali k nam na Glavatišče? – Čujte, jâ bi vas prosil ka nam nabęrete mandarine tak – ka bo na saki mandarini klica i bâr jęden list! Kaj košta, košta, ali ka bodo takše! … Bez listov jih najte voziti, jer nečemo! – Mooože?”
Onda mo je toti – od Neretve govoril:
“- Ali šjor Đuro, a ča će vam listovi, ča će vam klice?! – Mi to bacamo! To vam ne triba!”
Đura mo je išče jęmpot rękel:
“- Prosim vas, gospon, mi očemo mandarine s klicaj i listima i nikše druge! – Može?”
Dalmuš je rękel Đuri: ” – Ali … tehnologija branja je taka da nam – ne odgovara igrati se sa time … znate berači … Ajd, dobro, neka vam bude – kad ste več navalili! Bit će tako!”
F četrtek so Đura, Sida i drugi penzijonéri čakali pred penzijonérskim dómom. Ali, čoveka od Neretve – ga ga né bilo! – Đura zéme telefona pa ga zove:
“- Halo šjor, dé ste tak dugo? – Mi tu čâkamo mandarine! – Pęlate jih? – Da bote dojšli?”
Ali šjor mo je vęzdar rękel:
“- Šjor Đuro, izvinte, jako mi je ža, ali ne mogu vam dopelat! – Auto mi se pokvarilo. A nabra sam vam baš – prave! – Ali, ća sad moremo!? – Sad je tako! – Tko zna… – Možda dogodine!”
Đura mo je onda ovak rękel:
“- Šjor, najte biti takši! – Čé me vę prevârite, več ga ga nębode suradje! – Do zutra si poprâvite aota, ili si posódite nekšega drugoga i dopęlajte mandarine, kak smo se dogovorili, s klicaj i z listaj, drugač bom sima okóli v Međimorjo povédal da ste me prevarili i naj z vami več nišči ne déla! – Pa bote te vidli – da drugo leto nišči, od vas tu nav štel kupiti mandarine!”
Onda se je šjor premislil pa mo je obęčal:
“- Dobro, šjor Đuro, dopelat ću van mandarine u pondijak ili utorak! Valjda ću popraviti auto! Bi će ka ća ste rekli: s listovi i petiljke, kad ste već tolko navalili!”
F pondélek so Đura i drugi penzijonéri čakali mandarine z Neretve, ali ga ga né bilo. Đura ga je zvâl dé je – ka je išče né dojšel! Of mo veli:
“- Evo bere se! – Bere se! – Sutra, šjor Đuro! – Sutra! – Ka ća smo rekli! – Bez brige!”
F tork znova čâkajo penijonéri.
– I résen, evo ti, šjor z Neretve pęla mandarine! Pun kombi!
Da je čovek počel prodâvati, f kištama med mandarinaj so bile – i zeléne klice, i zeléni listi, ali samo zgór poméšani z mandarinaj! – Néti jęden list se je né držal za mandarino. Đura je to odma preštimal pa mo je pregovoril:
“- Čujte šjor, rękli smo ka na mandarinaj mórajo biti gori listi i klice!? – Vi ste dopęlali mandarine bez klici i bez listi, a onda ste sam f kište, med jih potępli listje i pomętali klice!? – Čujte, to tak nejde! – Tak smo se né dogovorili!”
Onda se šjor od Neretve resrdil pa je spočital Đuri:
“- Šjor Đuro, nemojte tako! Tražili ste mandarine i – evo, dopela sam vam ih! – Tražili ste listove i petiljke i – evo dopela sam vam ih! Sad još tražite da se listovi i petiljke drže za mandarine!? – Pa zar vi neznate kako se to daleko transportiiira! – Bili su listovi na mandarinama ali su putem otpali! – I kliiice su bile na mandarinama, ali su putem otpale! – To je daleki put! – To se putem drmalo! – To se treslo! – To se poskidalo! – A ća bi vi sad ’tili!?”
Đura mo je te rękel sam išče to:
“- Verjem vam, šjor ka je pót totaj mandarinaj bil dugi i ka jim je kaj-kaj toga po póto opâlo doli, poskidalo se! – Zaprav, totaj mandarinaj je pót bil i hajdi dukši nego bi si čovek mogel misliti! – Ali gospon, itak vutim hiladama kilometri kulko so mandarine pręjšle, nešterni listi so vam se itak né – poskidali i to – oni listeki šteri so zakęljeni na kište od mandarini kę imate f kombijo, etikéte na kištaj, na šteraj piše “Turkiye Recep Tayy Erdogan 2019.”!”
