Đurin zęt Ivo i ščerka Zdénka z malim Kadirom živijo f Čakofco. Skorom saki tjęden dójdejo glet bako Sido i dedo Đurija na Glavatišče. Da ido dimo baka jim naklâdne pun cekar mesa. Sida i Đura so se čudili ka tak puno jéjo, ali…valda, mlâdi so pa morejo! Naj jim bó.
F srédo, da so bili na Glavatiščo, punica Sida je zęta Ivija malo – nadigla:
“- Kaaaj Ivek, od sobote je privas f Čakofco proščéje, Prcinkolovo! – Bote kaj…? – Mislim… čé bi, te to né treba na velikom! I mi smo se malo ravnali… – Mi vam, ako treba pomoremo! Ęm imamo hajdi mesa … dvâpot smo klali! – Mislim … kak očete …!
Ivo je nikaj né rękel, pa so se dale okóli Prcinkolovoga nika né spominali.
Da so se Ivo i Zdénka otprâvlali, Sida je kak i nâvek, Zdénko pitala čé oče išče neka, čé ji kaj fal’i… Zdénka se je kak premišlâvala, pa ji je onda bole na stihoma zgovorila:
“- Pa, čé imaš malo mesa, mi moreš dati… čé róm tak ponujaš…!?
Sida se odma zagnâla f špajz jer – za svoje, óna nębo škrtârila:
“- Dénem ti kak on tjęden da sam ti dâla célo hrpt’išče …! – Â tu je išče céla plečka i falat krmenatlina … čé več imate proščéje, ka te … nate gladuvali…! Ti samo ręči… Imamo!”
F petek so pâk Ivo i Zdénka z malim dečkérom dojšli k – dedi i baki na Glavatišče. Đura se sęl z zętom pod hruško, pa je donęsel litra i vodo. Te je i Đura pehal – zęta Ivija:
“- Kaj Ivo, od zutra te imate proščéje f Čakofco!? – Kaj bote v nedelo meli kakše strajske? – Bote koga zvâli? – Mislim, né me brige, ali mi imamo f soboto časa … čé bi róm tak…”
Ivo je jęn čâs bil stiha, a onda je obrnol spominka na neka drugo:
“- Deda, fino vam je vino! – Imate ga išče hajdi? – Bó vam zdržalo do nóvoga?”
Đura je zmâhnol z rókom i gavalérski zgovoril:
“- Haaajdi, Ivek! – Bez brige! – Čé nucaš, lęfko ti natočim… čé boš trebal ove dneve …!?”
Ivek je jęn čas bil stiha i te je … kak – né pręveč zainteresérano, zgovoril Đuri:
“- Pa, deda, čé ponujate … čé ga résen hajdi imate … dobro bi nam dojšla… jęna bučka!”
Đura se odma zdigel, odišel f podrom i zęto Iveko natočil dęsetliterno pleténko!
Čim je dojšel z bučkom gori, Ivo jo je odnęsel v aoto, Zdénka je skoš’uvala bako, a mali Kadir jim je sima pajdóč – mętal puse! I otpęlali so se f Čakovec!
Dojšla je nedela.
Đura i Sida so ne bili pozváni na proščéje. Ali ne zamerijo. Mlâdi so! Valda Ivo i Zdenka némajo takšo šęgo ka bi zvâli druge na proščéje (makar k drugaj radi idejo).
Itak, Sida i Đura so mozgali i – premislili so si! – Zakaj naj išli na proščéje? Pa ne mórajo iti róm k Ivijo i Zdenki!
Zvâli so Pepija i Lizo, oni so móm bili “za” i otpravili so se skup f Čakovec.
Bili so skup pre meši, onda so se malo špancérali kre štandi. Baka je kupila vnukeco jęnoga bónzija. A onda so – zažejali … i oglâdnili … Te je Đura rękel ovak:
“- Hote idemo glet, kaj itak délajo naši! – Oni ne obdržâvlejo proščéje, ali jâ bom jih pozval ka s’i skupa idemo nekam vum, ka neka negder spijemo i ka se najémo! – Jâ bom sę platil!”
Tak so obrnoli k ščerki i zęto. Dojšli so do jivoga stanovâja, ali – sę zakléjeno! Nigder nikoga! -Kaj moreš. – Onda so se otpravili ka sámi nâjdejo nekše mesto – za nekaj pojesti!
Stiska! Ludi so se gjęli. Licitari, štandi, ringišpili, mužika. – Dé vę najti mesto? – Ali Đura je dugi kak zdénčni kluč i zględal je dvé hiže dale, v jęnim sredje zapuščenim dvoro, polek – po fórmi uboške ménze, vu dvoru se pije i jé! – Na vrâtaj s flomastrom piše “Čvapčiči, ražnjiči i svinsko pečéje”. Pepi je pod slivom kre plota spazil slobodnoga stola i štiri štokrline. Zabejžali so se nutri i odma zavzeli totoga stola!
Mlâda frčna kęlnerica je móm došmigala do jivoga stola i pita jih:
“- Kaj bote?”
Naručili so si dvóje ražniče, dvója svinska pečéja i litra i vodo.
Donęsla je. Lépo je dišelo. Malo žilavo, ali dobro. Vino fino. Skorom kak Đurino!
Najeli so se. Đura je zvâl kęlnerico ka plat’i – sę kupa. Znala je napamet i odma mó pové:
“- Hilado osemsto sędemdeset štiri kune i čętrdeset dęvet lipi!”
“- Kuuulko?!”
“- Rekla sam vam!”
“- Kaaaj? – Za totih pâr cvirki i dvé svinske žlundre, tulših penęz?! – Ste vi normalni? – Mi to namo platili da se na glâvo obrnete! – Pa, kaj je vam?! – Čija je to krčma? – Što to prodâvle!”
Kęlnerica jim je važno rękla:
“- Ovo organizéra Udroga penzijonéri Glavatišče iz Nedelišča, čé vas róm baš zanima!”
“- Kaaaj? – Štóóó? … – Dopęlajte nam šéfe tote organizacije!”
Kęnerica se obrnola kręj od jih, odišla je do širom otprtoga cpódjega obloka i zakričala:
“- Šéééfe, šeéééfica? – Nekši tu …ka nam rękla kakši, nečejo platiti… zaj… zaprav, iščejo vas!”
Črez vrâta so se odma srd’ito vum zagnali … Đurin zęt Ivo i ščerka Zdénka!
