Ón tjęden f tork, Đura, Pepi, Drago i Fęri so se zišli na špricaro. Đura je pital:
“- Dečki, drugi tjęden f pondélek je Valentinovo. Bomo kaj kupili našaj žęnaj? Čé namo, onda bomo to – poslušali célo leto! – Neka jim móramo kupiti, makar róm tulko ka bo za znaho!”
Drago je onda preložil:
“- Zutra je sréda. – Hote ka se skupa otpęlamo f Čakovec i neka jim tam kupimo! – Mooože?”
“- Mooože!”
F srédo v jutro, da so žęne išče spâle, odpęlali so se f Čakovec. Pre Kišovi Mari so suknoli jutrešjega šusa i dogovorili se ka se rezidejo saki na svojo stráno i tu nâjdejo v 11-i.
Da so se znova zišli i otpravili dimo, spominali so se kaj je šteri svoji kupil. Đura je povédal:
“- Jâ sam Sidi kupil riplo, ka bo, da ga nav struje ili bo mašina f kvâro, mogla prati – na róko!
Ovi tri so se smij’ali! Onda je Pepi povédal:
“- Jâ sam Lizi kupil velikoga pisanoga zemlénoga protvana, ka more spęči za nas sę štiri!”
Pofâlili so ga kak se je to dobro zmislil i s’i so se smij’ali! – Te je Drago povédal:
“- Jâ sam Juli kupil šaraklina! – Tak ka bo lęži râšila i kurila, jer ona – najrâjši râši i kuri!
Na takšo sponâšaje so prasnoli f sméh! – Te je i Fęri govoril:
“- Jâ sam svoji Ilki kupil ružđaka! – Imamo pun kuružjâk kuruze, pa ka nam ne d’e pod kvâr!
I stoga, kak i zę sęga drugoga, so se smij’ali tak ka so se pokali po koĺenima!
Onda so se spominali – da bi jim dâli dâre. Dogovorili so se ka se f soboto odvečer nâjdejo pre Đuri i ka bodo jim onda del’ili – saki svojoj žęni dâra za Valentinovo!
V soboto odvečer so se zišli pre Đuri – kak je bilo dogovoreno. Del’ili so žęnaj dâre – kak je šteri kaj kupil. Đura je Sidi dâl riplo, Pepi Lizi zemlénoga protvana, Drago Juli šaraklina, a Fęri svoji Ilki ružđaka. – Bilo je parâdno i s’i so se smij’ali – z parâdni dâri.
Te so jim žénske rękle ka znâjo za šâlo i ne srdijo se na to – kaj so jim jivi móži zebr’ali! V isti so se žénske pofâlile da jim je jiva Sekcija “Veteran-mažoretkiji” z Udroge penzijonéri, saki žénski – svoji članici Sekcije, dar’uvala povekšano i oremleno, sliko sake žénske kak veteran-mažoretkije! – Onda so jim žénske kâzale saka svojo sliko – kak mažoretkije i rękle da bodo si saka svojo dele na zdi! – I z toga so se takâj s’i skupa smij’ali. I tak je pre Đuri minola tota vesęla sobótna odvečerka.
V nedelo odvečer Sida vel’i Đuri:
“- Čuj Đuręęk, pozâbila sam ti povedati, ka smo se mi žénske z Sekcije veteran-mažoretkiji, dospoménole ka zutra, f pondélek, na Valentinovo, sę skupa idemo f Crkvenico na pâr dni na izlet. Najšle smo si fal apartmane i sáme bomo si kuhale. – Ido i Liza i Ilka i Jula i druge! – Idemo zarán, z malim aotobusom, da boš ti išče spâl! – Jâ bom si zela tvojo kârtico od pénzije – čé bom kaj nucala… nigdâr nęznaš! – Čé boš ti kaj męne nucal, me nazovi!”
Đura je né nika rękel. Bilo mo je prav-za-prav praf.
F pondélek, da so žénske dišle f Crkvenico, dečki so se odma zjutra čuli s telefónaj, ka se dogovorijo kam bodo išli slavit Valentinovo! Ręčeno je da se zidejo odvečer pre Đuri.
Onda se Đura malo vrtel po kuhji, po stójo, pa po dvoro, pa so mo nešterne stvâri bile čudne, a nešterne – né jasne! K pólnevo, da so i ovi dečki bili pre jęmo, zvâl je svojo Sido:
“- Sidikaaa, kak je kaj tam? – Čuuuj, ka nam na dugoma, iskal sam po ormâro, pa ga mi né néti jęne čiste košole, a néti pa véša!? – Néti jęni gâč!? – Čuj i frižider je čista prâzen, a kârtico si mi dnęsla… A i – nęznam… dé se na totim nóvim elektrčnim šporhato vužge… šteri gómb se šrâjfa, a šteri se pret’isne za kâhlo ili kaj… Ili rink…?! – I čuj, résen, néga f komóri néti šake kuruze za živâd, a … bila je… naružđeno dvé vreči… a živâd krjefče i …kokodače i…?!”
Sida mo je z Crkvenice povédala:
“- Đurek, more biti ka ga ga né čisti košoli néti gâč, ali – vę imamo nóvo riplo, pa tam na kupo zmâzanih cójki, prebęri pâr gâč i pâr košoli pa to na róko, z riplom zriplaš, pa žmekneš, pa splâviš…. vę se flętno posuš’i… – Čuj, čé ga ga né ničesa vu frižidero, posódi si od Pepija protvana, oni vę imajo nóvoga, pa primi jęno kokoš, pa si to sčisti i spęči, ęm je to né nekši problem… – Čé se ne razmiš v gómbe na nóvim šporhato, te si zakuri f komórici na stârim šporhato na drva, pa si tam spęči kokoš, jer drva imaš, a k tomo si lęfko od Dragija posódiš nóvoga šaraklina ka – fést nakuriš i narâšiš! – Résen, kuruzo kâ je bila f culekaj, sam prodala Imbreko, vę je dobra céna … pa čé vę nucaš a néga je, pusti si z kuružjâka, pa naružđi pâr vreči, naj ti Fęri posódi ružđaka, on vę ima nóvoga… ęm je né problem… pâr vréč naružđiti!”
Đura je gledal malo zgubleno, malo splâšeno, pa jo je onda pital:
“- Čuuuj …. Sidika, a da vi, résen… dójdete dimo?!”
Sida mo je, z dosta premišlâvaja, povédala:
“- Đurek nęęęznam točno da pemo dimo! Tu nam je lépo! – Gazdi vel’ijo da se ne móramo žuriti, da bomo apartmane platile samo pól céne i da nas oni išče – častijo s tri nočeji na râdeš! Pa se nekaj… spom’inamo ka bi i drugi tjęden …. no… bomo vidle… bom ti javila…!”
I dok je odzâdi dódjala popéfka, “Valent, Valent, cvét ruméni”, Sida je Đuro pitala išče i tó:
“- A kaaaj, Đurek, ti morti fal’im? – Čé boš si me slučajno zaželęl i čé boš mi štel čestitati Valentinovo, te si me lęfko pogledneš i kušneš na oni lépi, nóvi, oremleni sliki, ka ves’i f kuhji na zido!”
