Na Prvi maj so za Jóžefovo Đura i Sida bili v Dujkovco, pre krsnaj kumaj na proščéjo. Da so po meši dojšli k hiže, sę je dišelo po mesi i prfkačaj tak ka so pogutâvali sline. Sida je koma zgovorila: “- Kaaaj tulko sprâvlate!? – Za nas je to – né treba! – Mi smo vam maloga stroška! – Mój stâri se vugible jestvine, a jâ ne pojém néti tulko – kulko jęn mâček.”

I résen obed je minol, a Đura i Sida so naténkoma jeli. Nikaj so si né dvâpot deli.

Po obedo je dujkoski kum zel v aoto kumče, maloga Đurijovoga vnuka Jožeka i tpęlal ga med štande. Bili so na proščéjo jęno vuro, a dečkéreca je dopęlal nazâj z igrâčkicom f škatulki.

Đura je rękel: “- Neeesi se kume trebal otrâšati, deca so več ničega né žęlni!”

Odvečer so odišli: “- Fâla lépa! – Pa najte nika zameriti! – Dojdite k nam na proščéje na Glavatišče za Trijâke, ka povrnemo … drugač bomo se srdili na vas – do groba!”

“- Bómo dojšli, bez brige! – Vidimo se privas na fârnim proščéjo, na Trijâke!”

Fčęra so bili dujkoski kumi pre Đuri i Sidi na proščéjo! Sida je prepravila tak – kak se za proščéje preprâvi. Bilo je sęga i hajdi toga.

Da so dojšli od meše, i kuma je na šténgaj spopévala: “- Kuuuma drâga, več vošem ka hajdi toga sprâvlaš, jer vum deš’i po jestvini i prfkačima tak ka me zahlikâvle! – Mi smo ti strašno maloga stroška! – Ęm, nečemo, ęm nęsmimo, a néti smo né žęlni!”

Sida ji je rękla: “- Niiika pósebnoga, drâga kuma, tak kak i saki dén! – Hote si sędite!”

Obed je trajal, kak je na proščéjo red. Kumi so malo jeli. Bili so preštimáni.

Po obedo je Đura maloga dujkoskoga kumiča Tončeka, posel v aoto i otpęlal ga je na proščéje ka detęto neka kupi! – Kaj si zbęre. Dojšli so dimo za jęno vuro. Kumi so jih čakali i čim so se vrnoli od štandi – kumi so se otpravili dimo: “- Fâla lépa, na najte nika zameriti!”

Da so kumi dišli dimo, Đura je hodil po dvoro i srdito rital kaméje!

Da je dojšel nutri, Sida ga je pitala: “- Đuuura, kaj si tak srdit? – Čuuuj, maloga so stroška, malo so pojeli, malo so nas koštali, ali smo jim vrnoli kumstvo kak spâda!”

Đura je zazijal: “- Jeee? – Maloga stroška? – A jiv dečkér? – Misliš ka je i on maloga stroška?”

Sida je ostâla bez réči!

Đura je kričal: “- Toga ščepca sam vę pęlel med štande, tak kak je zâdjipot kum pęlal našega vnuka Franceka. Da smo dojšli na proščéje najpredi se vozil z aotekaj trinájst po za po red. Te sam ga pital čé išče kaj nuca, pa me je odvlekel k štando z nekšaj škatulkaj i zebral si jęno … Jâ sam praf né razmel kaj … ali toti krâmar mi je zarečunal – dvé hilade štiristopędeset kuni! Te sam toga gjusa pital – kaj sam mo to jâ tulko platil, pa mi je rękel ka je to nekši … običen plejstejšen…!? – Pa kaaaj ti misliš …!? – Ovi jęgovi so résen, maloga stroška, ali toti jiv gjus mi je bormeš – odnęsel célo pénzijo!”

Sida se f strâho od fršloga, sela na stolec. “- Kuuulko? – Célo pénzijo? – Plejstejšena?! … Pa je totoga gjusa né sramota to iskati?! … Ali … – Čuj, résen … jâ sam vidla, po dujkoskomo proščéjo, da je kum pęlel našega vnuka Jožeka med štante, ka se i toti naš gjus igral … i doma se i vę hajdipot potli igra … z nekšim čista nóvim mobitelom …?!