Sida je ón tjęden kupila flance. Đura je videl kulko je toga donęsla i govoril ji je:
“- Kaj si tulko toga kupila?! – Čęmo to več vę? – Kam se žuriš? – To se vę išče nęsmi sad’iti! – Znâš ka bodo za vęč-tjęden dni zmržjeni sveci. – A vu te dneve, kak so Sveti Pankracije i Servancije pa sę do Svete Žofe, kaj gut ludi posad’ijo, od toga ga ga né hasna!”
Ali, kaj bi! Sida je to né poslušala. Posad’ila je flance, i paradajzove i paprikine i vugorkove…
Đura se obrnol kręj od j’e i odišel svojim poslom – v Udrogo penzijonéri.
Okóli Udroge je trâva zrâsla tak visoko ka mo je bila skorom do kólen. Kupil je pre Košéro za Udrogo – nóvo kosilico. Telefonéral je vnuko Jožeko f Čakovec:
“- Jožek, imam dobroga biznisa za tębe! – Moreš dobro zaslužiti, a malo delati? – Kupil sam nóvo kosilico! – Samohodno! Ne móraš nika rivati. Ide sáma! Išče te vleče! – Čuj, boš pokosil dvora Udroge penzijonéri! – Po košji dob’iš 200 kuni! – Može? – Može. – Zutra moreš početi. Ali paaazi! – Ka bo to lééépo, rędno i sčista pokošeno!”
Jožek je razmel. Dospoméloli so se.
Jožek je zutra dojšel kosit. – Pólne ga je dojšla glet baka Sida.
“- Jožek, kak ti ide?! Donęsla sam ti obeda. F kántici ti je slâtka repa s paradajzom! – Bormeš lépo… Dobro ti ide, samo malo ti je šigo-migo… Ali dobro, pazil si nam cvétjiče i grmeke…!”
Te je Sida dišla dimo, a Jožekovoga posla je dojšel glet Đura:
“- Jooožek!? – Pa kak to kosiš? – Sę ti je šigo – migo, cik cak, okóli pa na skriž, vdilem pa poprečki?! – Jožek, kositi se móra râvno! – Štrafe mórajo biti jęna do druge, f pravac…!”
Jožek mo je štel ręči da je baka to gledala i pofâlila ga – ka je pazil…. Đura je zakričal:
“- Puuusti babe! – One bi męj tu delale nekše … grobeke… grmeke… pa hujkice! – Vrâbec po totomo dračo i po totaj… nekšaj… kak se zovejo..! – Jožek, paaazi! – Dogovârjam ti i druge, dobre posle ali paaazi, ka bo to lééépo! – Dójdi zutra v jutro! Čim mine rosa, povedal bom ti kam peš i odma v jutro se moreš hapiti kositi! – Može? – Može.”
Jožek je dojšel drugo jutro zarán. Đura je bil f krčmi na jutręšjomo šuso. Baka je rękla:
“- Jožek, Đura bo lęhko f krčmi i jęno vuro. – Téčâs moreš pokositi i našoga dvora! – Jâ ti plat’im stotko! – Može? Može!”
Jožek se je složil i hitil se na posel! – Da je Sida nutri pospravila, Jožek je bil gotov:
“- Baka, jâ sam gotov! – Zvâl sam dedija na mobitel i rękel mi je da – naj idem kosit okóli naše kapęlice na Glavatiščo!”
“- Dooobro! – Idi deček! – Da se vrneš s košje, te ti platím za naš dvór!”
“- Čuj, baka, a moreš mi toto stotko dati odma, črez oblok… trebam… i ka ne… pozâbimo…!”
Baka Sida mo je črez oblok por’inola stotko. I Jožek je odišel!
Za pól vure je Đura dojšel z jutręšjega šusa z krčme. Sida je zišla na dvór ka mo pové:
“- Đura, dé si tak dugo? – Jožek je bil i odišel je dale, kosit okóli kapélice. – Kak vidiš, pokósil nam je i dvora… Glej, glej… pa dé je moje cvétje… pre stupaj so i bile jureščice… kre plota hačuni, fijólice… – Néga mi néti tulipani… bili so s kamęnaj ograjeni… kre pločnika… – Pa kaj je to Jožek… sę po rédo…? – Đuuura, idi za dečkérom! – Odišel je kosit k kapélici, a tam smo mi žénske ón tjęden posad’ile štiri grede cvétja… i… “
Sida je onda zakr’ičala išče bole:
“- ĐURA, pa po dvoro mi hodi – samo kvočka… A dé so mi mali piceki? …Néga mi piceki! Sam … prholije okóli kvočke let’i…!? – Đura bejži… za jim..!”
Đura je postâl… i preblédel:
“- Né mi je treba bejžati. – A tębi se – né treba boj’ati zmržjeni sveci. Poględni si na grede – dé si posad’ila flance! – Sę je tó of prelętel s kosilicom! – A bormeš i – tvoje béle kamene ze šteraj si ograd’ila jureščice i tulipane – sę je to – pokosil… Â glej… tu je jęden nož od kosilice… a â je i drugi… i â…”
